बाँके पुस ७ गते ।
संयुक्त बजार अनुगमन समिति बाँकेले नेपालगन्जका आधा दर्जन मासु पसललाई कारवाही गरेको छ । सडेगलेका मासु विक्री वितरण गर्ने र सरसफाईमा गम्भीर हेल्चेक्र्याइ गर्ने आधा दर्जन मासु पसलेलाई कारवाही गरिएको अनुगमन समितिका संयोजक बाँकेका सहयाक प्रमुख जिल्ला अधिकारी लाल बहादुर गुरुङले बताए । कारवाहीबाट ८० हजार रुपैयाँ उठेको उनले बताए ।
समितिले शुक्रबार विहान नेपालगन्ज उपमहानगरपालिका वडा नं. १३ रामवाग र वडा नं.२० राँझाका दुई दर्जन मासु पसलको अनुगमन गरेको थियो । तीमध्ये राँझाका अधिकांश मासु पसलहरुले अस्वस्थकरण मासु विक्रीवितरण गर्ने गरेको पाइएपछि उनीहरुलाई कारवाहीको दायरामा ल्याइएको उनले बताए ।
उनका अनुसार न्यू भेरी मिट एण्ड दाना सप्लार्यसलाई २० हजार रुपैयाँ जरिवाना गरिएको छ । उक्त पसलबाट कुहिएको ७ किलो कुखुराको मासु समेत टोलिले जफत गरेको छ । त्यसैगरी न्यू योनिशाभा फ्रेस हाउस र दानिस फ्रेस हाउसलाई पनि २०–२० हजार रुपैयाँ जरिवाना गरिएको छ । योनिशाभाबाट खान अयोग्य ५० किलो कुखरा र दानिस फ्रेस हाउसबाट ८ किलो खसीको मासु जवफ गरिएको पनि सहायक प्रमुख जिल्ला अधिकारी गुरुङले बताए ।
त्यसैगरी रामवागमा रहेको सलिम अहमद खसी मासु फ्रेस हाउसलाई पनि टोलिले कारवाही गरेको छ । उक्त हाउसमा ५ किलो कुहिएको खसीको मासु फेला परेपछि १० हजार जरिवाना गरिएको छ । मुर्तुजा मासु पसलमा समेत कुहिएको १० किलो मासु फेला परेपछि संचालक मुर्तुजा चिकवालाई पनि १० हजार जरिवाना गरिएको भेटेरिनरी निरीक्षक डा.शंकर न्यौपानेले बताए । ‘झन्डै दुई दर्जन मासु पसलको अनुगमन गर्दा आधादर्जन पसलहरुको अवस्था अत्यन्तै नाजुक देखियो उनले भने–‘मानव स्वास्थ्यसँग गम्भीर खेलवाड गरेको पाइएपछि उनीहरुलाई कारवाही गरिएको हो ।
दर्ता नगरी संचालन भएका पसलहरुलाई तत्काल दर्ता गर्न निर्देशन पनि दिएका छौं ।’ अनुगमन टोलि पुग्दा केही व्यवसायी पसल बन्द गरेर भागेका थिए । राँझा चोकको चौधरी फ्रेस हाउसका संचालक अर्नुन चौधरी अनुगमन टोलि देख्ने वित्तिकै पसल बन्द गरेर भागेका थिए । यसअघि विहीबार पनि टोलिले जमुनाह, गणेशमान चोक र धम्वोजी क्षेत्रका माछा–मासु पसलको अनुगमन गरेको थियो । झन्डै आधादर्जन पसललाई कारवाही गर्दा ५० हजार जरिवाना उठेको थियो । फ्रेस हाउसहरुले कुहिएका मासु विक्री वितरण गर्ने, सरसफाई नगर्ने, मासु ढुवानीमा उपयुक्त चिस्यानको मापदण्ड पूरा नगरी ढुवानी गर्ने गरेको समितिले जनाएको छ ।
Discussion about this post