बाँके पुस १४ गते ।
नेपालगन्ज उपमहानगरपालिका ५ का शारिरिक अशक्त राजु खानलाई गौरव स्मृति तथा वि योर सेल्फ फाउण्डेशनले ई–रिक्सा उपहार दिएको छ । क्यान्सरका कारण दाहिने खुट्टा गुमाएका खानको जिवनयापनलाई सहज बनाउन ई–रिक्सा प्रदान गरिएको फाउण्डेशनका सल्लाहकार प्रदिप शाहले जानकारी दिए ।
सामाजिक दायित्व अन्तरगत संस्थाका अध्यक्ष स्वर्गिय गौरव शाहको जन्मोत्सवको अवसर पारेर रक्तदान र ई–रिक्सा हस्तान्तरण कार्यक्रम गरिएको उनले बताए । उक्त रिक्सा कार्यक्रमका प्रमुख अतिथि नेपालगन्ज उपमहानगरपालिकाका मेयर प्रशान्त विष्टले खानलाई हस्तान्तरण गरेका थिए ।
शारिरिक अशक्तताका कारण उनको दैनिकी कष्टकर भएको जानकारी पाएपछि जिवन यापनलाई सहज बनाउन ई–रिक्सा प्रदान गरिएको शाहले बताए । उनले उक्त रिक्सामा अशक्तको भाडा नलिने सहमति भएको बताउनु भयो ।
दुई लाख २० हजारमा खरिद गरिएको उक्त रिक्सा यातायात ब्यवस्था कार्यालय र नेपालगन्ज उपमहानगरबाट स्विकृति लिएको बताउँदै उनले आगामी दिनमा पनि राज्यको सेवा सुविधाबाट बञ्चित र बहिष्करणमा परेकालाई सहयोग गर्ने उनले बताए ।
ई–रिक्सा हस्तान्तरण तथा रक्तदान कार्यक्रममा प्रमुख अतिथि नेपालगन्जका मेयर प्रशान्त विष्टले सरकारले गर्ने काम फाउण्डेशनले गरेको भन्दै धन्यवाद दिएको बताए । उनले रक्तदानले जिवन दान दिने भएकोले यो जस्तो पवित्र काम अरु हुन नसक्ने जिकिर गरे । उनले फाउण्डेशनको काममा स्थानीय सरकारले सहयोग गर्ने आश्वासन दिँदै मानविय सेवा नै सच्चा धर्म भएको बताए ।
गौरव शाहको जन्मोत्सवको अवसरमा फाउण्डेशनले रक्तदान कार्यक्रम समेत गरेको छ । फाउण्डेशनका अध्यक्ष मधु शाहको अध्यक्षतामा भएको कार्यक्रममा नेपाल रेडक्रस सोसाइटी रक्त संचार केन्द्रका प्रमुख उपेन्द्र रेग्मी लगायतले विचार राखेका थिए ।
ई–रिक्सा उपहार पाएपछि राजु खानले कष्टकर जिवनलाई सहज बनाउन फाउण्डेशनले सहयोग गरेको बताए ।
‘काम गर्न नसकेर जिवन कष्टकर मात्र थिएन । जिवन जिउने आशा मरिसकेको थियो । ई–रिक्साले मेरो मात्र नभई मेरो सिंगो परिवारको जिवनयापनमा टेवा पुग्नेछ,’ उनले भने ।
स्वर्गिय गौरवको जन्मोत्सवको अवसरमा आयोजित रक्तदानमा एक सय १० बढिले रक्तदान गरेको सल्लाहकार प्रदिप शाहले जानकारी दिए ।
Discussion about this post