बाँके साउन २७ गते ।
अव महत्वपूर्ण चाड पर्वहरु भित्रिन थालेका छन् । चाडपर्व भित्रिन थालेसँगै नेपालगन्जको बजार व्यवसाय चलायमान हुन थालेको छ । तर जुन किसिमले नेपालगन्जको बजार व्यवसाय फस्टाउनु पर्ने हो त्यो वातावरण बन्न सकेको छैन । नेपाली उपभोक्ताहरु नेपालगन्जको बजार छाडेर रुपैडिया बजार किनमेलका लागि रुपैडिया गइरहेका छन् । दैनिक पन्ध्र हजारको हाराहारीमा नेपाली उपभोक्ताहरु रुपैडिया किनमेलका लागि गइरहेका छन् ।
नेपालगन्ज उद्योग वाणिज्य संघका पूर्वअध्यक्ष कृष्ण प्रसाद श्रेष्ठले उद्योग वाणिज्य संघले नेपाली उपभोक्ताहरुलाई नेपालगन्ज बजारमा रोक्न नसकेको बताए ।
उनले उद्योग वाणिज्य संघको वर्तमान नेतृत्वले सुरुमा केही पहल गरेको देखिएपनि अहिले पनि व्यक्तिगत स्वार्थमा लागेका कारण नेपालगन्जका व्यसायीहरु प्रभावित भएको बताए । ‘नयाँ नेतृत्व आउँदा भन्सारमा केही कडाइ गरेको जस्तो देखियो उनले भने–‘अहिले संघ व्यक्तिगत स्वार्थमा लागेको देखिएको छ यो राम्रो होइन् ।’ नेपालगन्ज भन्दा रुपैडियामा सामान केही सस्तो हुनु स्वभाविक भएको उनको भनाइ छ । ‘भन्सार गरेर यहाँ ल्याएर सामान विक्री गर्दा केही महंगो हुन जान्छ तर गुणस्तरीयताका लागि भने रुपैडिया भन्दा नेपालगन्ज उपयुक्त हो’ उनले भने । उनले उपभोक्ताहरुले पनि नेपालकै बजार व्यवसायलाई प्रोत्साहन गर्नुपर्ने बताए ।
खुला सीमा नाकाका कारण तस्करी बढ्दो क्रममा रहेको पनि उनले बताए । पहिलोको तुलनामा तस्करी रोकिएको होला तर खुला सीमानाका कारण जति रोकिनु पर्ने हो त्यो रोकिएको छैन श्रेष्ठको भनाइ छ । नागरिक समाज बाँकेका संयोजक समेत रहेका नेपालगन्जका व्यापारी नेता श्रेष्ठले खुला सीमानाकाबाट हुने अवैध तस्करी नियन्त्रणका लागि जनशक्तिको व्यवस्थापन गर्न पनि सुझाव दिए ।
नेपाल भारतको बाँकेतर्फ करिव ६५ किलोमिटर खुला सीमानाका छ । सशस्त्र प्रहरी र नेपाल प्रहरी नाकामा खटिएका छन् । तर सीमित जनशक्तिका कारण चोरी तस्करी नियन्त्रणमा समस्या भएको र त्यसले राज्यको करोडौं राजस्व गुम्दै आएको छ । खुला सीमानाको फाइदा उठाउँदै यहाँबाट लागु औषधको ओसारपसारदेखि मानव वेचविखनको जोखिम समेत बढ्दै गएको छ ।
अझ भन्ने हो भने लागु औषध ओसारपसारका लागि त यो नाका ट्रान्जिट प्वाइन्ट नै मानिन्छ ।नेपालगन्ज नाकामा एक्स रे र सिसि क्यामेरालाई व्यवस्थित गरिनुपर्ने उनको भनाइ छ । ‘जसरी नेपालले वर्सेनि व्यापार घाटा व्यहोर्दै आएको छ त्यसलाई व्यवस्थित गर्न नाकामा कडाइ गर्न आवश्यक छ’ उनले भने ।
भिडियो हेर्नुहोस्
Discussion about this post