बाँके जेठ ७ गते ।
नेपालगन्ज उपमहानगरपालिका—८ स्थित धोवी तालमा उपमहानगरले फोहोर फाल्दा दुर्गन्ध फैलिएको छ । नेपालगन्ज रंगशालाको गेटबाट सय मिटर पश्चिममा रहेको यो तालको छुट्टै विशेषता र आफ्नै महत्व छ । कहिलै नसुक्ने यो ताल संरक्षण अभावमा सुक्न थालेको छ । वर्षात र हिउँदमा यो तालमा पानी भए पनि तीन वर्षदेखि पानी सुक्न थालेको छ ।
फोहोर फाल्नका लागि नेपालगन्ज उपमहानगरले ३८ करोड लागतमा प्रविधियुक्त ल्याण्डफिल साइट निर्माण गरेको छ । नगरबाट संकलन भएको फोहोर भण्डारण गर्ने र कुहिने बस्तुबाट प्राङ्गारिक मल उत्पादन तथा प्लाष्टिक र फलामजन्य बस्तु विक्रि गरेर आर्थिक उपार्जन गर्ने लक्ष्य लिएर उक्त ल्याण्डफिल साइट निर्माण गरिएको हो ।
तर, उपमहानगरले ल्याण्डफिल साइटमा फाल्ने फोहोर नेपालगन्जको ब्यस्त मानिने र इतिहास बोकेको तलाउमा भण्डार गरि दुर्गन्ध फैलाउने काम गरेको छ । उपमहानगरको नजरमा पर्न नसकेको उक्त ताललाई पुरेर भौतिक संरचना निर्माण गर्ने दाउमा उपमहानगर छ ।
उपमहानगरले फोहोर थुपारेका कारण आसपासको क्षेत्रमा दुर्गन्ध फैलिन थालेको छ । तलाउमा फालेको फोहोरले घर भित्रसमेत बस्न नसक्ने अवस्था सिर्जना भएको स्थानीय प्रामिला खडकाले बताइन् । उनले तालमा फालेको दुर्गन्ध घरसम्म पुग्ने गरेको बताइन् । ‘घरको झ्याल खोलेर बस्न सकिदैन । बाहिर बसेर चिसो हावा खान नपाइने भएको छ,’ उनले भनिन् ।
यो तालको नजिकै मन्दिर र पिपलको बोट छ । क्रियापुत्रीहरु पानी चढाउन यहि पिपलमा आउँछन् । यहि मन्दिरमा क्रियापुत्री बस्ने घरसमेत निर्माण गरिएको छ । दुर्गन्धले मन्दिरमा दर्शनका लागि आउने र पिपलमा पानी चढाउन आउने क्रियापुत्रीलाई समेत असज बनाएको छ । ‘यो तालको आफ्नै महत्व र विशेषता छ,’ एक स्थानीयले अनलाइन खोजखवरसँग भने, ‘उपमहानगरले यो ताललाई पुर्नु हुँदैन, बरु यसको संरक्षणमा ध्यान दिनुपर्छ ।’
नेपालगन्जका क्रियापुत्रीहरु मन्दिर र पिपलको पूजा गर्ने, तालको छेउमा कपाल खौरिने र यहि तालमा स्नान गर्दै आएका थिए । यसअघिका वडा अध्यक्ष सुरेन्द्र गुप्ताले तालको सौन्दर्यकरण गर्ने प्रयास गरे पनि विवादका कारण सफल हुन नसकेको बताए । उनले फोहोरले तलाउ पुर्ने कार्य सरासर गलत भएको समेत बताए । ‘तालको आफ्नै महत्व र इतिहास छ । तालको सौन्दर्यकरण गर्न माग गर्दै उनले इतिहास मेट्ने काम गर्न नहुने स्पष्ट पारेका छन् । ‘तलाउ पुर्ने काम कुनै पनि हालतमा सुहाउँदो छैन,’ उनले भने ।
स्थानीयले उक्त ताल ब्यवस्थापन गर्न उपमहानगरसँग माग समेत गरेका छन् । ‘भएका तालको संरक्षण गर्नुपर्ने ठाउँमा माटो र फोहोर फाल्ने कार्य राम्रो भएन,’ एक स्थानीयले भने, ‘ताल संरक्षणका लागि तिन वटै तहका सरकारले ध्यान दिन आवश्यक छ ।’
यस विषयमा नेपालगन्जका मेयर प्रशान्त विष्टलाई फोन गर्दा उठाएनन् भने वडा नं. ८ का वडा अध्यक्ष रजनीश बाजपेयीले अनभिज्ञता प्रकट गरे । उनले माटो पटान र फोहोर फालेको आफूलाई कुनै जानकारी नआएको बताए । ‘फोहोर फाल्ने र माटो पटान गर्ने वडाको कुनै योजना छैन । उपमहानगरको सरसफाई शाखाले फोहोर फाल्न लगाएको भए मलाई जानकारी भएन,’ उनले भने ।
तर, स्थानीयले फोहोर फालेको विषयमा वडा अध्यक्ष बाजपेयीलाई धेरै पटक जानकारी गराएको उषा कुमारी खडकाले बताइन् । उनले पटक पटक जानकारी गराउँदासमेत कुनै सुनुवाई नभएको बताइन् । फोहोर नफाल्न भन्दा पनि कसैले नसुनेको एक स्थानीयले गुनासो सुनाए ।
Discussion about this post