बुटवल जेठ १२ गते ।
आगामी आर्थिक वर्षका लागि प्रस्तुत हुने बजेटका सिद्धान्त र प्राथमिकता लुम्बिनी प्रदेशसभामा पेस भएको छ । आइतबार बसेको लुम्बिनी प्रदेशसभा बैठकमा प्रस्तुत भएको विनियोजन विधेयकमा समावेश हुने बजेट तथा कार्यक्रमका सिद्धान्त र प्राथमिकताले भौतिक विकास भन्दा मानवीय विकास र उत्पादन तथा उत्पादकत्व वृद्धि गर्ने कुरालाई महत्त्व दिइएको छ ।
लुम्बिनी प्रदेशको दोस्रो आवधिक योजनालाई मुख्य आधार मानी बजेट तथा कार्यक्रमको सिद्धान्त र प्राथमिकता निर्धारण गरिएको छ । संसद्मा बजेट तथा कार्यक्रमका सिद्धान्त र प्राथमिकता पेस गर्दै आर्थिक मामिला तथा योजना मन्त्री धनेन्द्र कार्कीले कृषिको आधुनिकीकरण र व्यवसायीकरण,निजी क्षेत्रको सहकार्यमा नवप्रवद्र्धन र लघु उद्यमका कार्यक्रम सञ्चालन गरिने, गुणस्तरीय शिक्षा र स्वास्थ्यमा विशेष ध्यान पुराइने, पोषणका सूचकमा सुधार गरी वाल मृत्युदरमा सुधार ल्याउने अघि सारिएको बताए ।
त्यसै गरी प्रदेशका रणनीतिक अधुरा सडकलाई सम्पन्न गर्ने, स्थानीय तहसँगको सहकार्यमा युवाहरूका लागि सिपमूलक तालिम प्रदान गरी आयआर्जनमा वृद्धि गर्ने, अन्य प्रदेशसँग सामञ्जस्य हुने गरी राजश्व सङ्कलनका दायराहरूलाई बढाइने, वातावरणीय प्रदर्शन कम गर्न विद्युतीय चुलो वितरण र विद्युतीय गाडीको प्रयोगलाई बढाउने कार्यलाई प्राथमिकतामा राखिएको छ ।
जेठ ५ गते प्रदेश सभामा पेस भएको लुम्बिनी प्रदेशको आगामी आर्थिक वर्षको नीति तथा कार्यक्रम जेठ १० गते शनिवार पारित भएको थियो । आइतवार प्रदेश सभामा पेस भएको आगामी आङ्गिक वर्षको बजेट तथा कार्यक्रमका सिद्धान्त र प्राथमिकता माथि जेठ १३ र १४ गते छलफल हुने कार्यसूची रहेको प्रदेशसभा सचिवालयले जनाएको छ ।
Discussion about this post