विध्वंसात्मक गतिविधिमा संलग्नको पहिचान गर्दै बाँके प्रशासन : भिडियो फुटेज वा अन्य सूचना दिन अपिल

बाँके भदौ ३० गते ।
गत भदौ २४ गते बाँकेमा भएको विध्वंसात्मक गतिविधिमा संलग्नको पहिचान गरि कानुनी कठघरामा ल्याउन बाँके प्रशासनले प्रक्रिया अगाडी बढाएको छ । बाँके प्रशासनले सोमवार एक सुचना जारी गरि विध्वंसात्मक गतिविधिमा संलग्नको पहिचान गर्ने कार्य अगाडी बढाएको जनाएको हो ।

भदौ २४ गते भएको प्रदर्शनको क्रममा केही उच्छृंखल्न व्यक्ति तथा समूहले जिल्लास्थित दर्जनौँ सरकारी कार्यालयको महत्वपूर्ण अभिलेख, कार्यालय सामग्री, सरकारी गाडी र कार्यालय भवन समेतमा आगजनी, तोड्फोड गरि अकल्पनिय क्षति पुर्याएको प्रशासनले जारी गरेको सूचनामा उल्लेख छ ।

‘सरकारी, सार्वजनिक सम्पत्ति र निजी सम्पत्तिमा तोड्फोड, आगजनी र लुट्पाट गर्ने व्यक्ति तथा समूहलाई समयमै पहिचान गरी कानूनी कारवाहीको दायरामा ल्याउन नसकिएमा समाजमा दण्डहिनता र कानुनविहीनताको अवस्था सृजना हुन सक्ने जोखिम उत्पन्न हुनुका साथै भविष्यमा समेत यस्ता प्रकृतिका विध्वंसात्मक र गैह्रकानूनी गतिविधि हुन सक्ने जोखिम तथा चुनौतीलाई मध्यनजर गरी भदौ २४ गतेको विध्वंसात्मक कार्यमा संलग्न व्यक्ति एवम् समूहको पहिचान गरी यथाशिघ्र कानूनी कारवाहीको दायरामा ल्याउन अति आवश्यक देखिएको छ,’ प्रमुख जिल्ला अधिकारी धर्मराज जोशीले जारी गरेको सूचनामा उल्लेख छ ।

प्रशासनले विध्वंसात्मक गतिविधिमा संलग्नको पहिचान गर्न सहयोग पुर्याउन अपिल समेत गरेको छ । विध्वंस तथा ताण्डप र लुटपाट तथा आगजनी गर्ने ब्यक्तिको पहिचान गर्नुपर्ने भएकोले आफुसँग भएका जानकारी, सूचना, तथ्य प्रमाण र भिडियो फुटेज लगायतका सामग्री भए जिल्ला प्रशासनलाई उपलब्ध गराइदिनु हुन आग्रह छ,’ सूचनामा उल्लेख छ ।