बाँके चैत १९ गते ।
नेपालगन्ज–१२, कोरियनपुरमा चैत १४ गते राति जलेको अवस्थामा भेटिएकी सिर्जना बुढामगरको मृत्यु जलनका कारण भएको पोस्टमार्टम रिपोर्टले पुष्टि गरेको छ।
भेरी अस्पतालमा गरिएको परीक्षणअनुसार मृत्युको कारण जलन नै रहेको जिल्ला प्रहरी कार्यालय बाँकेका प्रवक्ता डीएसपी दीपक पातलीले जानकारी दिए।
प्रहरीका अनुसार चैत १४ गते राति करिब १२ बजे सिर्जना जलेको अवस्थामा फेला परेकी थिइन्। उनलाई उपचारका लागि भेरी अस्पताल लगिए पनि चैत १५ गते बिहान १ः२० बजे उनको मृत्यु भएको हो।
डीएसपी पातलीका अनुसार पोस्टमार्टम रिपोर्टले मृत्युको कारण स्पष्ट भएपछि घटनाबारे थप अनुसन्धान गर्न सहज भएको छ। यद्यपि घटनामा कसको कस्तो संलग्नता छ भन्नेबारे अनुसन्धान पूरा भएपछि मात्र निष्कर्षमा पुगिने उनले बताए।
नेपालगन्ज–८, रानीतलाउमा डेरा गरी बस्दै आएकी सिर्जना, उनीसँग लिभिङ टुगेदरमा बस्दै आएका आरिफ ढपालीको घर नजिकै जलेको अवस्थामा फेला परेकी थिइन्। घटनापछि आफन्तहरूले आरिफ ढपाली र उनका परिवारका सदस्यविरुद्ध किटानी जाहेरी दिएका छन्।
प्रहरीका अनुसार घटनापछि भारत पुगेका आरिफलाई अर्को दिन पक्राउ गरिएको छ। साथै, उनकी आमा र दिदीलाई पनि नियन्त्रणमा लिएर अनुसन्धान भइरहेको छ। जाहेरीमा नाम उल्लेख भएका अन्य व्यक्तिहरूको खोजी कार्य जारी रहेको प्रहरीले जनाएको छ।
आफन्तहरूले सिर्जना र आरिफबीचको सम्बन्ध तनावपूर्ण रहेको र आरिफले नै हत्या गरेको आरोप लगाएका छन्। उनीहरूले आरिफको व्यवहार पहिलेदेखि नै हिंसात्मक रहेको दाबी गरेका छन्।
घटनाअघि पनि उनीहरूबीच विवाद भएको र कुटपिटपछि प्रहरीले आरिफलाई नियन्त्रणमा लिएको थियो। तर सोही दिन मिलापत्र भएपछि उनलाई छोडिएको र त्यसै राति घटना भएको प्रहरीको भनाइ छ।
घटनापछि सिर्जनाका आफन्तहरूले आरोपितको घरमा आक्रमण गर्ने प्रयास गरेपछि प्रहरीले सुरक्षा व्यवस्था कडा पारेको छ। आन्दोलनका क्रममा स्थिति उग्र बनाउन खोजेको आरोपमा सौरभ वर्मालाई नियन्त्रणमा लिएर सम्झाइबुझाइपछि छाडिएको प्रहरीले जनाएको छ।
हाल मृतकको शव भेरी अस्पतालमै राखिएको छ। घटनाको विरोधमा नेपालगन्जमा दैनिकजसो प्रदर्शन र सभा भइरहेका छन्। दोषीलाई कडा कारबाही गर्नुपर्ने माग तीव्र बन्दै गएको छ।
यसैबीच, विभिन्न संघ–संस्थाले बाँकेका प्रमुख जिल्ला अधिकारी दिलकुमार तामाङलाई ज्ञापनपत्र बुझाउँदै निष्पक्ष अनुसन्धान र दोषीमाथि कडा कारबाहीको माग गरेका छन्।
जिल्ला प्रहरी कार्यालय बाँकेले घटनाको विभिन्न कोणबाट अनुसन्धान भइरहेको जनाएको छ। साथै, सामाजिक सञ्जालमा भ्रामक वा द्वन्द्व बढाउने सामग्री नफैलाउन र सञ्चारमाध्यमलाई आधिकारिक स्रोतबाट पुष्टि गरी मात्र सूचना सम्प्रेषण गर्न अनुरोध गरेको छ।
Discussion about this post