बाँके वैशाख १ गते ।
नेपालगन्ज उपमहानगरपालिका–१२, कोरियनपुरमा जलेको अवस्थामा फेला परेकी २२ वर्षीया सिर्जना बुढामगरको मृत्यु प्रकरणमा संलग्न आशंकामा रहेका रहमत अली ढपाली अझै प्रहरीको नियन्त्रण बाहिर रहेका छन्। तर, उनी सामाजिक सञ्जालमार्फत सार्वजनिक भएका छन्।
गत चैत १४ गते राति जलेको अवस्थामा फेला परेकी सिर्जनाको सोही रात भेरी अस्पतालमा उपचारका क्रममा मृत्यु भएको थियो। घटनामा संलग्न रहेको आशंकामा प्रहरीले उनका प्रेमी आरिफ ढपालीसहित उनकी आमा, दिदी र एक नाबालक भाइलाई नियन्त्रणमा लिएर अनुसन्धान गरिरहेको छ।
आरिफका बुवा रहमत अली ढपाली र उनका अर्का छोरा आदिल ढपाली भने हालसम्म फरार छन्। फरार सूचीमा रहेका रहमत अलीले सामाजिक सञ्जाल फेसबुकमार्फत भिडियो सन्देश सार्वजनिक गर्दै आफ्नी श्रीमती र छोराछोरीलाई रिहा गरिए आफू र छोरा आदिल प्रहरीसमक्ष उपस्थित हुने बताएका छन्। उनीहरू हाल कहाँ रहेका छन् भन्ने यकिन जानकारी नभए पनि भारततर्फ लुकेर बसेको आशंका गरिएको छ।
सामाजिक सञ्जालमा सार्वजनिक हुँदा समेत प्रहरीले उनीहरूलाई पक्राउ गर्न नसकेको भन्दै सर्वसाधारणबाट आलोचना भइरहेको छ।
सिर्जनाको शव नेपालगन्ज उपमहानगरपालिका–८, रानीतलाउ नजिकै, उनी ‘लिभिङ टुगेदर’मा बस्दै आएका आरिफ ढपालीको घर आसपास फेला परेको थियो। मृतकका आफन्तले घटनामा आरिफको प्रत्यक्ष संलग्नता रहेको आरोप लगाउँदै आएका छन्।
घटनापछि फरार भएका आरिफलाई भने प्रहरीले भोलिपल्ट भारतको बहराइचबाट नियन्त्रणमा लिएको जनाएको छ।
Discussion about this post