बाँके वैशाख ३० गते ।
द्वन्द्वकालमा बन्द गरिएका बाँकेका सात वटा छोटी भन्सार कार्यालयमध्ये एउटा मात्रै पुनः सञ्चालन गर्ने सरकारी निर्णयप्रति जिल्लाका उद्योगी तथा व्यवसायीहरूले असन्तुष्टि जनाएका छन् । उनीहरूले अवैध आयात–निर्यात नियन्त्रण र राजस्व वृद्धि गर्न विगतमा सञ्चालनमा रहेका सबै छोटी भन्सार कार्यालय पुनःस्थापना गर्न माग गरेका छन् ।
सशस्त्र द्वन्द्वअघि जिल्लाको सुइया बघौडाको कटकुइयाँ, नरैनापुर, भगवानपुर, खडैचा–होलिया, हिरमिनियाको भगोटना, साईगाउँ तथा उढरापुर नाकामा छोटी भन्सार कार्यालय सञ्चालनमा रहेका थिए । सरकारले हालै नरैनापुर छोटी भन्सार मात्रै पुनः सञ्चालन गर्ने निर्णय गरेको हो ।
नेपालगन्ज उद्योग वाणिज्य सङ्घका पूर्वअध्यक्ष कृष्णप्रसाद श्रेष्ठले एउटा मात्रै छोटी भन्सार सञ्चालनले तस्करी तथा अवैध आयात–निर्यात नियन्त्रण गर्न नसक्ने बताए । उनले मुख्य नाकामा सय रुपियाँभन्दा बढी मूल्यका सामानमा भन्सार शुल्क लागू गरिएपछि अन्य नाकाबाट चोरी पैठारी बढ्न सक्ने भएकाले सबै छोटी भन्सार पुनः सञ्चालन गर्नुपर्ने आवश्यकता औंल्याए ।
सङ्घका अर्का पूर्वअध्यक्ष अब्दुल वाहिद मन्सुरीले पनि एउटा मात्रै भन्सार कार्यालयले समस्या समाधान नहुने धारणा राखे । मुख्य नाकामा कडाइ गरिएपछि अन्य क्षेत्रबाट अवैध कारोबार बढ्ने सम्भावना रहेकाले थप छोटी भन्सार सञ्चालनसँगै प्रभावकारी रणनीति आवश्यक रहेको उनले बताए ।
नेपालगन्ज उद्योग वाणिज्य सङ्घका वरिष्ठ उपाध्यक्ष चिरञ्जीवी ओलीले नरैनापुर छोटी भन्सार पुनः सञ्चालन हुनु सकारात्मक कदम भए पनि यसले मात्रै राजस्व चुहावट रोक्न पर्याप्त नहुने बताए । सीमावर्ती अन्य नाकामा पनि भन्सार कार्यालय सञ्चालन गर्न सके व्यापार व्यवस्थित हुने र राजस्व सङ्कलनमा सुधार आउने उनको भनाइ छ ।
यसैबीच, नरैनापुर छोटी भन्सार पुनः सञ्चालनका लागि आवश्यक तयारी भइरहेको नेपालगन्ज भन्सार कार्यालयका प्रमुख जर्नादन पौडेल ले जानकारी दिए । उनका अनुसार भौतिक पूर्वाधार निर्माण तथा कर्मचारी व्यवस्थापनको काम अगाडि बढाइएको छ ।
भारतसँग बाँकेको करिब ६५ किलोमिटर खुला सीमा रहेको छ । नरैनापुर गाउँपालिकाका अध्यक्ष इश्तियाक अहमद शाह ले साइड नाकाहरूमा सुरक्षाकर्मीको उपस्थिति रहे पनि भन्सार छली हुँदै आएको उल्लेख गर्दै नरैनापुरमा छोटी भन्सार सञ्चालन भएपछि अवैध आयात–निर्यात केही हदसम्म नियन्त्रण हुने विश्वास व्यक्त गरे ।
Discussion about this post