बाँके वैशाख ३० गते ।
नेपाल सरकारकी सीता बादीले बाँके जिल्लास्थित बाल सुधारगृहहरूको स्थलगत अनुगमन गरी त्यहाँको समग्र अवस्था, बालबालिकाको आवश्यकता तथा उनीहरूले भोगिरहेका समस्या र चुनौतीबारे जानकारी लिएकी छन् ।
मन्त्री बादीको सचिवालयका अनुसार पश्चिम नेपालको भ्रमणका क्रममा बाँके पुगेकी मन्त्री बादीले बैजनाथ गाउँपालिकास्थित नौबस्ता बाल सुधारगृह र डुडुवा गाउँपालिकामा रहेको जयन्दु बाल सुधारगृहको अनुगमन गरेकी हुन् ।
अनुगमनका क्रममा मन्त्री बादीले नौबस्ता बाल सुधारगृहका विभिन्न कोठाको निरीक्षण गर्दै बालबन्दीहरूको बसोबास, ओछ्यान, खानपिन, शौचालय, सुरक्षा तथा उपलब्ध सेवासुविधाबारे जानकारी लिएकी थिइन् ।
नौबस्ता बाल सुधारगृहका प्रमुख श्यामबहादुर रानाका अनुसार मन्त्री बादीले बालबन्दीसँग प्रत्यक्ष संवाद गर्दै उनीहरूको अवस्था र समस्याबारे सोधपुछ गरेकी थिइन् । साथै, बालसुधार गृहमा विभिन्न सिपमूलक तालिम सञ्चालन गर्ने योजना रहेको जानकारी पनि दिएकी थिइन् ।
बालबन्दीलाई सकेसम्म व्यस्त र सिर्जनशील गतिविधिमा संलग्न गराउन सके उनीहरूको सुधार प्रक्रियामा सकारात्मक प्रभाव पर्ने मन्त्री बादीले बताएको प्रमुख रानाले जानकारी दिए ।
त्यसैगरी मन्त्री बादीले डुडुवा गाउँपालिकास्थित जयन्दु बाल सुधारगृह पुगेर त्यहाँको अवस्थाबारे पनि जानकारी लिएकी थिइन् ।
यसैबीच, गत भदौ २४ गते जेनजी आन्दोलनका क्रममा नौबस्ता बाल सुधारगृहबाट फरार भएका ७८ जना बालबन्दीमध्ये ३३ जना अझै पक्राउ नपरेको जनाइएको छ । प्रहरीले उनीहरूको खोजी कार्य जारी रहेको जनाएको छ ।
Discussion about this post