बाँके, जेठ ३ गते।
बाँकेको जानकी गाउँपालिकामा सम्पन्न तेस्रो अध्यक्ष कप क्रिकेट प्रतियोगिताको उपाधि रमवापुर स्पोट्र्स क्लबले जितेको छ।
जानकी गाउँपालिका–३ स्थित कन्या माध्यमिक विद्यालयको खेल मैदानमा शनिबार सम्पन्न रोमाञ्चक फाइनल खेलमा रमवापुरले मानपुर राइजिङ क्लबलाई पाँच विकेटले पराजित गर्दै उपाधिमाथि कब्जा जमाएको हो।
टस जितेर पहिले ब्याटिङ गरेको मानपुर राइजिङ क्लबले निर्धारित १० ओभरमा ९ विकेट गुमाउँदै ९९ रनको लक्ष्य प्रस्तुत गरेको थियो। जवाफी ब्याटिङमा उत्रिएको रमवापुर स्पोट्र्स क्लबले पाँच विकेट गुमाएर १०० रन पूरा गर्दै जित हात पारेको हो।
प्रतियोगिताको समापन समारोहमा जानकी गाउँपालिकाका अध्यक्ष छब्बन खाँले विजेता तथा उपविजेता टोलीलाई नगद पुरस्कारसहित सिल्ड प्रदान गरे। विजेता रमवापुर स्पोट्र्स क्लबले ५० हजार रुपैयाँ तथा उपविजेता मानपुर राइजिङ क्लबले २५ हजार रुपैयाँ नगद पुरस्कार प्राप्त गरेका छन्।
समारोहलाई सम्बोधन गर्दै अध्यक्ष खाँले नेपालमा क्रिकेटप्रतिको बढ्दो आकर्षण र नेपाली खेलाडीहरूले अन्तर्राष्ट्रिय स्तरमा हासिल गरिरहेको सफलताले युवापुस्तामा सकारात्मक ऊर्जा थपिएको बताए।
उपाधि जित्दै गाउँपालिकाको प्रतिष्ठा उचो बनाएको उल्लेख गर्दै उनले रमवापुर स्पोट्र्स क्लबका खेलाडीहरूको मेहनत, समर्पण र खेलभावनाको प्रशंसा गरे।
गाउँपालिकाको शिक्षा, युवा तथा खेलकुद शाखाको आयोजनामा सम्पन्न प्रतियोगितामा गाउँपालिकाभित्रका १६ वटा क्रिकेट टोलीको सहभागिता रहेको थियो। प्रतियोगिता तीन दिनसम्म सञ्चालन भएको आयोजकले जनाएको छ।
Discussion about this post