बाँके, असार २० गते ।
भारतीय उच्च सुरक्षा अधिकारीले नेपाल–भारत सीमा क्षेत्रमा रहेको जमुनाह–रुपैडिहा नाकाको अनुगमन तथा निरीक्षण गरेका छन्।
सीमावर्ती भारतीय क्षेत्र देवीपाटन रेन्जका डीआईजी अशोक कुमार नेतृत्वको टोलीले नेपाल–भारत सीमास्थित जमुनाह नाका तथा भारततर्फको रुपैडिहा नाकाको निरीक्षण गर्दै सीमा सुरक्षाको अवस्थाबारे जानकारी लिएको हो।
निरीक्षणका क्रममा डीआईजी कुमारले रुपैडिहा प्रहरी थानाका अधिकारी, सशस्त्र सीमा बल (एसएसबी) चेकपोस्टका अधिकारी तथा नेपाल प्रहरी र सशस्त्र प्रहरी बल नेपालका अधिकृतसँग भेटवार्ता गरेका थिए। भेटका क्रममा सीमा सुरक्षालाई अझ प्रभावकारी बनाउन आवश्यक समन्वय र सहकार्यमा जोड दिँदै विभिन्न सुझाव दिएको रुपैडिहा प्रहरी थानाका प्रमुख प्रहरी निरीक्षक रमेशसिंह रावतले जानकारी दिए।
प्रहरी निरीक्षक रावतका अनुसार डीआईजी कुमारले दुवै देशका सुरक्षा निकायबीचको समन्वयलाई थप सुदृढ बनाउनुपर्नेमा जोड दिएका छन्। साथै, सीमावर्ती क्षेत्रमा नागरिकको आवागमनलाई सहज बनाउने, आपराधिक गतिविधि नियन्त्रण गर्ने तथा लागुऔषध ओसारपसार रोक्न विशेष सतर्कता अपनाउन सम्बन्धित निकायलाई निर्देशन दिएका छन्।
उनले भारत सरकारले सीमाक्षेत्रको सुरक्षालाई उच्च प्राथमिकतामा राखेको उल्लेख गर्दै नेपाल–भारत सीमा संवेदनशील क्षेत्र भएकाले सुरक्षा व्यवस्थालाई अझ सुदृढ बनाइने बताएका थिए।
अनुगमनका क्रममा डीआईजी कुमारले नेपाल–भारत अन्तर्राष्ट्रिय सीमासम्म पुगेर सुरक्षा अवस्थाको स्थलगत मूल्याङ्कन गरेका थिए। उनले सीमाबाट आवतजावत गर्ने व्यक्तिको जाँच प्रक्रियाको समेत अवलोकन गर्दै सुरक्षा व्यवस्थामा थप सतर्कता अपनाउन निर्देशन दिएका थिए।
सोही अवसरमा उनले नेपालतर्फको इलाका प्रहरी कार्यालय जमुनाह तथा सशस्त्र प्रहरी बल नेपाल भन्सार सुरक्षा कार्यालयका अधिकृतसँग पनि भेटघाट गरेका थिए। सीमा सुरक्षामा प्रभावकारी सफलता हासिल गर्न दुवै देशका सुरक्षा निकायबीच निरन्तर समन्वय र सहकार्य अपरिहार्य रहेकोमा उनले जोड दिएका थिए।
निरीक्षणका क्रममा सीमा क्षेत्रमा सुरक्षा जाँच तथा सर्वसाधारणको आवागमन व्यवस्थापन सन्तोषजनक रहेको प्रतिक्रिया प्राप्त भएको रुपैडिहा प्रहरी थानाका प्रमुख प्रहरी निरीक्षक रमेशसिंह रावतले बताए।
Discussion about this post