बाँके, असार २१ गते ।
वडा प्रहरी कार्यालय नेपालगन्जका प्रमुख प्रहरी निरीक्षक (इन्स्पेक्टर) शेखर खड्का नगदसहित पुरस्कृत भएका छन् । नेपालगन्जको शान्ति–सुरक्षा, अपराध नियन्त्रण तथा नागरिकमैत्री प्रहरी सेवा प्रवाहमा उल्लेखनीय योगदान पुर्याएवापत उनलाई पुरस्कृत गरिएको हो।
अपराध अनुसन्धानमा अब्बल मानिने निरीक्षक खड्काको उत्कृष्ट कार्यको मूल्याङ्कन गर्दै नेपाल प्रहरी प्रधान कार्यालय, प्रहरी महानिरीक्षकको सचिवालयले उनलाई नगदसहित पुरस्कृत गर्ने निर्णय गरेको छ ।
एक इमानदार, कर्तव्यनिष्ठ र जुझारु अधिकृतका रूपमा चिनिएका खड्काले नेपालगन्जको जिम्मेवारी सम्हालेको छोटो समयमै स्थानीय नागरिकको विश्वास जित्न सफल भएका छन् । उनले नगरको सुरक्षा व्यवस्थापनलाई प्रभावकारी बनाउनुका साथै प्रहरी र समुदायबीचको सम्बन्धलाई सुदृढ बनाउन अग्रणी भूमिका निर्वाह गर्दै आएका छन्।
नगरको शान्ति–सुरक्षा चुस्त राख्न र विभिन्न अपराधमा संलग्न रही लामो समयदेखि फरार रहेका प्रतिवादीहरूलाई पक्राउ गरी कानुनी दायरामा ल्याउन उनले महत्वपुर्ण भूमिका निभाउँदै आएका छन् । केन्द्रीय अनुसन्धान ब्युरो (सीआईबी), अपराध महाशाखा लगायत देशका विभिन्न संवेदनशील क्षेत्रमा खटिदा समेत उनले उत्कृष्ट कार्य सम्पादन गरेका थिए ।
सोही कार्यसम्पादनको उच्च मूल्याङ्कन गर्दै प्रहरी प्रधान कार्यालयले उनलाई पुरस्कृत गरेको हो ।
यो पुरस्कारले आफूलाई नागरिक सेवा र अपराध नियन्त्रणको यात्रामा थप जिम्मेवार र उत्साहित बनाएको निरीक्षक खड्काले बताए । `मेरो कामको मुल्यांकन भएको छ। पुरस्कारले मलाई थप जिम्मेवार र कर्तब्य निष्ठ बनाएको छ,’ उनले भने, `पुरस्कारले मलाई उत्साहित मात्र नभई काम गर्ने उत्साह समेत थपेको छ ।’
Discussion about this post