बाँके, असार २२ गते ।
ऊर्जा, जलस्रोत तथा सिँचाइमन्त्री विराजभक्त श्रेष्ठले पश्चिम नेपालका बाँके, बर्दिया, रोल्पा, दाङ, प्युठानलगायत जिल्लामा विद्युत् आपूर्ति तथा वितरणको वर्तमान अवस्था, देखिएका समस्या र समाधानका उपायबारे जानकारी लिँदै सम्बन्धित निकायलाई आवश्यक निर्देशन दिएका छन्।
पश्चिम नेपालको भ्रमणका क्रममा नेपालगन्ज पुगेका मन्त्री श्रेष्ठले नेपाल विद्युत् प्राधिकरणको लुम्बिनी प्रदेश डिभिजन कार्यालयमा पुगेर विद्युत् आपूर्ति तथा वितरणको अवस्थाबारे विस्तृत जानकारी लिँदै सरोकारवालासँग अन्तरक्रिया गरेका हुन्।
डिभिजन कार्यालय, प्रदेश कार्यालय तथा नेपालगन्ज वितरण केन्द्रका प्रमुखबाट जानकारी लिएपछि मन्त्री श्रेष्ठले पुराना वितरण संरचनाका कारण विद्युत् आपूर्तिमा पटक–पटक समस्या दोहोरिने गरेको उल्लेख गर्दै आगामी आर्थिक वर्षमै वितरण प्रणालीको स्तरोन्नति तथा सुदृढीकरणका लागि आवश्यक बजेट व्यवस्था गरिने प्रतिबद्धता व्यक्त गरे।
उनले वितरण प्रणालीमा लामो समयदेखि अपेक्षित स्तरोन्नति हुन नसक्दा संरचनागत तथा प्राविधिक समस्या बढ्दै गएको बताए। सातौँ विद्युतीकरण आयोजना सम्पन्न भएपछि सन् १९९० यता वितरण सञ्जालमा उल्लेखनीय सुधार हुन नसकेको उल्लेख गर्दै उनले बढ्दो विद्युत् मागअनुसार पूर्वाधार विस्तार हुन नसकेको बताए।
मन्त्री श्रेष्ठका अनुसार वार्षिक रूपमा करिब १५ प्रतिशतका दरले विद्युत् माग वृद्धि भइरहेका बेला पुरानो संरचनाबाट बढ्दो लोड व्यवस्थापन गर्न कठिनाइ भइरहेको छ। कोहलपुर राष्ट्रिय ग्रिड तथा टनकपुर आपूर्तिको अन्तिम बिन्दुमा रहेको वितरण प्रणाली, स्विचिङ प्रणालीका चुनौती, नजिकै विद्युत् उत्पादन केन्द्रको अभाव, न्यून भोल्टेजको समस्या तथा निर्माणाधीन न्यू नेपालगन्ज सबस्टेशन समयमै सञ्चालनमा आउन नसक्दा विद्युत् आपूर्तिको गुणस्तर प्रभावित भएको उनले बताए।
उनले फिडर ओभरलोड, पटक–पटक हुने ट्रिपिङ तथा जीर्ण वितरण संरचनाका कारण उपभोक्ताले अपेक्षाअनुसारको गुणस्तरीय सेवा पाउन नसकेको पनि उल्लेख गरे।
अन्तरक्रिया कार्यक्रममा मन्त्री श्रेष्ठले आगामी गर्मीयामअघि निर्माणाधीन न्यू नेपालगन्ज सबस्टेशन सञ्चालनमा ल्याउन आवश्यक समन्वय र सहजीकरण गर्न सम्बन्धित निकायलाई निर्देशन दिँदै नेपालगन्जमा आवश्यक क्षमताका थप ट्रान्सफर्मर उपलब्ध गराइने जानकारी दिए।
साथै, वितरण सञ्जालको क्षमता अभिवृद्धि, पुराना लाइन तथा कन्डक्टरको स्तरोन्नति, आवश्यक स्थानमा नयाँ फिडर विस्तार तथा प्रभावकारी लोड व्यवस्थापनका कार्यक्रमलाई उच्च प्राथमिकताका साथ अघि बढाइने उनले प्रतिबद्धता व्यक्त गरे।
कार्यक्रममा नेपाल विद्युत् प्राधिकरणको लुम्बिनी प्रदेश कार्यालयका प्रमुख मनोज यादव, लुम्बिनी प्रदेश डिभिजन कार्यालय नेपालगन्जका प्रमुख दीपक गौतम तथा नेपालगन्ज वितरण केन्द्रका प्रमुख सञ्जयकुमार मिश्रले विद्युत् आपूर्ति तथा वितरणको वर्तमान अवस्था र विद्यमान समस्याबारे मन्त्रीलाई जानकारी गराएका थिए।
सो अवसरमा स्थानीयवासीले पनि विद्युत् वितरण सेवामा देखिएका समस्या, अनियमित आपूर्ति तथा न्यून भोल्टेजलगायत विषयमा मन्त्री श्रेष्ठको ध्यानाकर्षण गराएका थिए।
Discussion about this post