बाँके, असार २२ गते ।
दिगो वन संरक्षण तथा व्यवस्थापनलाई प्रभावकारी बनाउने उद्देश्यले बाँके जिल्लामा चालु आर्थिक वर्ष २०८२/०८३ मा दुई नयाँ चक्ला वन थपिएका छन्। यससँगै जिल्लामा चक्ला वनको संख्या तीन पुगेको छ।
डिभिजन वन कार्यालय बाँकेका प्रमुख सिनियर डिभिजनल वन अधिकृत शंकरप्रसाद गुप्ताका अनुसार राप्तीसोनारी गाउँपालिकाको माथेवास–शम्शेरगञ्ज क्षेत्रमा यसअघि एकमात्र चक्ला वन सञ्चालनमा रहेको थियो। चालु आर्थिक वर्षमा राप्तीसोनारी गाउँपालिका–३ र ४ मा भुवर भवानी चक्ला वन तथा वडा नं. १ मा खर्चेताल चक्ला वन स्थापना गरिएसँगै जिल्लामा चक्ला वनको संख्या तीन पुगेको हो।
गुप्ताका अनुसार माथेवास–शम्शेरगञ्ज चक्ला वन क्षेत्रफलका आधारमा नेपालकै सबैभन्दा ठूलो चक्ला वन हो। ३१ वटा सामुदायिक वन समेटिएको यो चक्ला वन २ हजार ५७८ हेक्टर क्षेत्रफलमा फैलिएको छ, जहाँ वैज्ञानिक तथा व्यावसायिक वन व्यवस्थापन अभ्यास हुँदै आएको छ।
डिभिजन वन कार्यालयका अनुसार विगतमा सालका परिपक्व रूखहरू समयमै व्यवस्थापन नहुँदा कुकाठमा परिणत हुने अवस्था थियो। चक्ला वन व्यवस्थापन प्रणाली लागू भएपछि उमेर पुगेका रूखलाई निर्धारित मापदण्डअनुसार कटान गर्ने र त्यसको स्थानमा नयाँ बिरुवा हुर्काउने वैज्ञानिक विधि अवलम्बन गरिएको छ। यसबाट वनको पुनर्जनन र उत्पादकत्वमा सुधार आउने अपेक्षा गरिएको कार्यालयले जनाएको छ।
डिभिजन वन कार्यालय बाँकेका योजना शाखा प्रमुख तथा सहायक वन अधिकृत सुशिल सुवेदीका अनुसार जिल्लाका तीनवटै चक्ला वन र ५८ सामुदायिक वन गरी कुल १९ हजार ६५३ हेक्टर क्षेत्रफलमा दिगो वन व्यवस्थापन लागू गरिएको छ। यसले वन संरक्षणलाई मजबुत बनाउनुका साथै राजस्व संकलन, स्थानीय रोजगारी सिर्जना र वन स्रोतको दिगो उपयोगमा सकारात्मक योगदान पु¥याएको उनले बताए।
कार्यालयका अनुसार दिगो वन व्यवस्थापन कार्यक्रम लागू भएपछि वनको गुणस्तरमा सुधार आएको, सुरक्षा र संरक्षण प्रणाली प्रभावकारी बनेको, स्थानीय समुदायको आयआर्जन तथा रोजगारीका अवसर बढेको र विकास निर्माणका गतिविधिमा समेत टेवा पुगेको छ।
Discussion about this post