बाँके, साउन ७ गते ।
बाँकेको नेपालगन्जबाट ४०० ग्राम लागू औषध ब्राउन सुगरसहित दुई महिला पक्राउ परेका छन्।
लागुऔषध नियन्त्रण ब्यूरोको नेपालगन्ज शाखाबाट खटिएको प्रहरी टोलीले नेपालगन्ज उपमहानगरपालिका–१८ मा लागू औषधको खरिद–बिक्री भइरहेको सूचनाका आधारमा छापा मार्दा उनीहरूलाई पक्राउ गरेको हो।
पक्राउ पर्नेमा रुकुम पश्चिमको मुसिकोट नगरपालिका–१ की ३३ वर्षीया ललिता बुढाथोकी र नेपालगन्ज उपमहानगरपालिका–१८ की २४ वर्षीया निशा मगर रहेको प्रहरीले जनाएको छ।
प्रहरीले उनीहरूको साथबाट ४०० ग्राम लागू औषध ब्राउन सुगर र तीन थान मोबाइल फोन बरामद गरेको जनाएको छ।
लागुऔषध नियन्त्रण ब्यूरोका सहप्रवक्ता प्रहरी नायब उपरीक्षक जीवन निरौलाका अनुसार पक्राउ परेका दुवै जनालाई थप अनुसन्धान तथा कानुनी कारबाहीका लागि जिल्ला प्रहरी कार्यालय बाँकेमा बुझाइएको छ।
घटनाबारे थप अनुसन्धान भइरहेको प्रहरीले जनाएको छ।
Discussion about this post