बाँके, साउन १९ गते ।
भेरी अस्पतालको सिटी स्क्यान सेवा करिब दुई वर्षपछि पुनः सञ्चालनमा आएको छ। बिग्रिएर थन्किएको मेसिन मर्मतसम्भार गरेपछि अस्पतालले सेवा सुरु गरेको हो।
सिटी स्क्यान सेवा बन्द हुँदा दुर्घटना तथा चोटपटक लागेका बिरामीले निजी स्वास्थ्य संस्थामा महँगो शुल्क तिरेर परीक्षण गराउनुपर्ने बाध्यता थियो। सेवा सञ्चालनमा आएपछि अब अस्पतालमै सुलभ दरमा सिटी स्क्यान गर्न सकिने भएको छ।
भेरी अस्पतालका प्रमुख मेडिकल सुपरिटेन्डेन्ट डा. नवीन दर्नालले लामो समयदेखि बन्द रहेको सेवा मर्मतपछि सञ्चालनमा ल्याइएको बताए। ‘सिटी स्क्यान सेवा मर्मत गरेर सञ्चालनमा ल्याएका छौं,’ उनले भने, ‘बन्द रहेका अन्य सेवासमेत क्रमशः सञ्चालनमा ल्याउने योजना छ।’
लुम्बिनी, कर्णाली र सुदूरपश्चिमका विभिन्न जिल्लाबाट बिरामी उपचारका लागि आउने भेरी अस्पतालमा सिटी स्क्यान सेवा बन्द हुँदा विशेषगरी आर्थिक रूपमा कमजोर बिरामी बढी प्रभावित भएका थिए।
अस्पतालमा बन्द रहेका सेवा सञ्चालन गर्ने, अपुग जनशक्ति व्यवस्थापन गर्ने, आवश्यक स्वास्थ्य उपकरण थप गर्ने तथा पूर्वाधार सुधारलाई प्राथमिकतामा राखेर काम भइरहेको दर्नालले बताए।
भेरी अस्पताल विकास समितिका कार्यवाहक अध्यक्ष डा. डक्टप्रसाद धितालले सिटी स्क्यान सेवा सञ्चालनमा आएपछि बाँके, बर्दिया, सुर्खेत, दाङलगायत विभिन्न जिल्लाबाट आउने बिरामीलाई सहज हुने बताए।
‘सिटी स्क्यानका लागि बाहिर जानुपर्ने बाध्यता हटेको छ,’ उनले भने, ‘यसबाट आर्थिक रूपमा कमजोर बिरामीलाई प्रत्यक्ष राहत पुग्नेछ।’
अस्पतालको सेवा विस्तार तथा सुदृढीकरणका लागि आवश्यक जनशक्ति र स्रोतसाधन उपलब्ध गराउन सङ्घीय स्वास्थ्य तथा जनसङ्ख्या मन्त्रालयसँग माग गरिएको अस्पताल विकास समितिले जनाएको छ।
अस्पतालका सेवा नियमित र गुणस्तरीय बनाउन उपकरणको नियमित मर्मतसम्भारसँगै प्राविधिक जनशक्ति र अनुगमनमा पनि ध्यान दिनुपर्ने अस्पताल विकास समितिका पूर्वसदस्य तथा नागरिक सरोकार मञ्च बाँकेका संयोजक कृष्णप्रसाद श्रेष्ठले बताए।
काठमाडौँको वीर अस्पतालसँगै स्थापना भएको भेरी अस्पताल १३६ वर्ष पुरानो हो। पश्चिम नेपालका विभिन्न जिल्लाका विपन्न तथा आर्थिक रूपमा कमजोर बिरामीको उपचारका लागि यो प्रमुख स्वास्थ्य संस्था मानिन्छ।
Discussion about this post