बाँके, भदौ १ गते ।
बाँकेको राप्तीसोनारी गाउँपालिका–८ ओभरीस्थित सर्पदंश उपचार केन्द्रमा गत आर्थिक वर्ष २०८२/८३ मा सर्प र बिच्छीको टोकाइबाट प्रभावित १२४ जनाले उपचार सेवा लिएका छन्।
उपचार केन्द्रका अहेब नन्दलाल पाण्डेका अनुसार उपचार लिनेमध्ये ५५ जना सर्पदंशका बिरामी थिए। तीमध्ये २९ महिला र २६ पुरुष छन्। सर्पदंशका पाँच बिरामीलाई अति विषालु सर्पले टोकेको थियो। उनीहरूलाई समयमै उपचारका लागि केन्द्रमा ल्याइएकाले सफल उपचार गर्न सकिएको पाण्डेले बताए।
यस्तै, गत आर्थिक वर्षमा बिच्छीले टोकेका ६९ जनाले उपचार सेवा लिएका छन्। तीमध्ये ४२ महिला र २७ पुरुष रहेको केन्द्रले जनाएको छ।
वर्षायाम सुरु भएसँगै सर्पदंशका घटना बढ्ने गरेका छन्। साउनदेखि असोजसम्म सर्पदंशका घटना बढी देखिने गरेको अहेब पाण्डेले बताए। वर्षाका कारण सर्पको बासस्थानमा पानी भरिएपछि सुरक्षित र सुख्खा ठाउँको खोजीमा सर्प घर, गोठ, खेतबारी तथा मानिसको आवतजावत हुने क्षेत्रमा आउने गर्छन्।
धान रोपाइँ, घाँस काट्ने, दाउरा संकलन गर्ने तथा खेतबारीमा काम गर्ने क्रममा पनि सर्पदंशको जोखिम बढी हुने गरेको स्थानीयको अनुभव छ। राप्तीसोनारी–८ कचनापुरका स्थानीय भपेन्द्र खत्रीले सर्पले प्रायः मानिसलाई आक्रमण गर्न नभई आत्मरक्षाका क्रममा टोक्ने गरेको बताए।
‘समयमै उपचार केन्द्रमा पु¥याउन सके सर्पदंशबाट ज्यान जोगाउन सकिन्छ भन्ने यहाँका घटनाले देखाएका छन्,’ उनले भने।
स्वास्थ्यकर्मीहरूले सर्पदंशबाट जोगिन राति हिँड्दा टर्च वा बत्ती प्रयोग गर्न, खेतबारी तथा झाडीमा काम गर्दा बुट र लामो पाइन्ट लगाउन, घरवरिपरि झाडी र फोहोर नराख्न तथा मुसाको नियन्त्रण गर्न सुझाव दिएका छन्। राति सुत्दा झुल प्रयोग गर्न र सर्प देखिएमा समात्ने वा मार्ने प्रयास नगरी सुरक्षित दूरी कायम गर्न उनीहरूको आग्रह छ।
सर्पले टोकेमा झारफुक, धामीझाँक्री वा घरेलु उपचारमा समय नबिताई सकेसम्म छिटो नजिकको स्वास्थ्य संस्था वा सर्पदंश उपचार केन्द्रमा पु¥याउनुपर्ने अहेब पाण्डेले बताए।
Discussion about this post