बाँके, भदौ १ गते ।
नेपालगन्ज उद्योग वाणिज्य संघको आगामी निर्वाचनका लागि चिरञ्जीवी ओली नेतृत्वको संयुक्त प्यानलले सोमबार सचिवालय सञ्चालनमा ल्याएको छ।
नेपालगन्जको न्यूरोडस्थित भानुभक्त चोकदेखि घरबारी टोल जाने बाटोमा स्थापना गरिएको सचिवालयको नेपाल उद्योग वाणिज्य महासंघका सदस्य अब्दुल वाहिद मन्सुरी (चुन्ना), नेपालगन्ज उद्योग वाणिज्य संघका अध्यक्ष टंकबहादुर धामी, संघका बाँके अध्यक्ष तथा महासंघका पूर्वसदस्य कृष्णप्रसाद श्रेष्ठ र संयुक्त प्यानल निर्वाचन परिचालन समितिका संयोजक ललितकुमार रौनियारले संयुक्त रूपमा उद्घाटन गरेका हुन्।
सचिवालय उद्घाटनमा अध्यक्ष पदका उम्मेदवार ओलीले उद्योगी–व्यवसायीका साझा समस्या समाधानका लागि संघलाई प्रभावकारी रूपमा अघि बढाउने बताए।
‘उद्योगी–व्यवसायीका साझा समस्या संघमार्फत उठाउनेछौं। समाधानका लागि सरकारलाई दबाब दिनेछौं,’ उनले भने, ‘संघलाई सबै उद्योगी–व्यवसायीको छाता संस्थाका रूपमा स्थापित गर्नेछौं।’
व्यवसायीलाई बाँकेमै बसेर व्यवसाय गर्ने वातावरण निर्माण आफ्नो प्राथमिकता रहेको ओलीले बताए।
संयुक्त प्यानलबाट महिला उपाध्यक्ष पदमा रूपा ओझा (सानु) उम्मेदवार छन्। ओझाले महिला उद्यमीका समस्या, व्यवसाय प्रवर्द्धन र क्षमता विकासका विषयलाई संघको प्राथमिकतामा राख्ने बताइन्।
‘महिला उद्यमीका समस्या पहिचान गरेर व्यवसाय प्रवर्द्धन र क्षमता विकासमा संघले प्रभावकारी भूमिका खेल्नुपर्छ,’ ओझाले भनिन्, ‘व्यवसायीको हकहितका साथै संघलाई पारदर्शी, जवाफदेही र सदस्यकेन्द्रित बनाउन भूमिका खेल्नेछु।’
ओली नेतृत्वको संयुक्त प्यानलबाट पदाधिकारी तथा सदस्य गरी २१ जना चुनावी मैदानमा छन्। उद्योगतर्फका उपाध्यक्ष कमलकुमार कार्की, वाणिज्यतर्फका उपाध्यक्ष विष्णुप्रसाद श्रेष्ठ, एसोसियट सदस्यतर्फ राजीव तलंगा र अब्दुल वाहिद अन्सारी तथा सम्बद्ध सदस्यतर्फ फणाधर भण्डारी र सुरेशजंग बञ्जारा निर्विरोध निर्वाचित भइसकेका छन्।
महासचिवमा विष्णु श्रेष्ठ, उपमहासचिवमा शिवप्रसाद दाहाल र कोषाध्यक्षमा टीकामणि उपाध्याय उम्मेदवार छन्।
सदस्य पदमा तोपबहादुर थापा, सन्तोषकुमार पौडेल, नन्दाराम जैसी, चाँदबाबु अन्सारी, जहाँगीर मुसलमान, आदित्य गुप्ता, अतुलकुमार गुप्ता, शरदराज अधिकारी, ई. नगेन्द्र शाही र शरदप्रसाद रिजाल उम्मेदवार छन्।
सचिवालय सञ्चालनसँगै संयुक्त प्यानलले चुनावी गतिविधिलाई तीव्र बनाएको छ।
Discussion about this post