बाँके, भदौ २ गते ।
जिल्ला प्रहरी कार्यालय बाँकेले अदालतबाट फैसला भई फरार रहेका २२ जना प्रतिवादीलाई एक साताको अवधिमा पक्राउ गरेको छ।
प्रहरीले फैसला कार्यान्वयनलाई प्रभावकारी बनाउने अभियानअन्तर्गत साउन २३ देखि २९ गतेसम्म जिल्लाका विभिन्न स्थानबाट उनीहरूलाई पक्राउ गरेको हो।
जिल्ला प्रहरी कार्यालय बाँकेका सूचना अधिकारी प्रहरी नायब उपरीक्षक (डीएसपी) प्रतितसिंह राठौरका अनुसार पक्राउ परेका २२ जनाबाट एक लाख ६७ हजार २०० रुपैयाँ जरिवाना असुल भएको छ। पक्राउ परेकाहरूलाई फैसला कार्यान्वयनका लागि सम्बन्धित अदालतमा बुझाइएको उनले बताए।
प्रहरीका अनुसार पक्राउ परेकाहरूलाई अदालतले कुल चार वर्ष एक महिना १५ दिन कैद सजाय तोकेको थियो।
अदालतबाट फैसला भई सजाय तोकिए पनि फरार रहेका प्रतिवादीको खोजी तथा पक्राउ अभियानलाई बाँके प्रहरीले गत वर्षदेखि निरन्तरता दिँदै आएको छ।
जिल्ला प्रहरी कार्यालय बाँकेका प्रमुख प्रहरी उपरीक्षक (एसपी) अङ्गुर जिसीले फैसला कार्यान्वयनमा प्रहरीले सक्रियता बढाएसँगै फरार प्रतिवादी पक्राउ पर्ने क्रम पनि बढेको बताए।
‘अदालतबाट सजाय तोकिएपछि पनि फरार रहेका व्यक्तिहरू समाजमा आपराधिक तथा गैरकानुनी गतिविधिमा संलग्न हुन सक्ने भएकाले उनीहरूको खोजी तथा पक्राउलाई प्राथमिकतामा राखिएको छ,’ उनले भने।
प्रहरीका अनुसार अभियान सुरु भएयता बाँकेमा हरेक महिना दुई सयभन्दा बढी फरार प्रतिवादी पक्राउ पर्दै आएका छन्। प्रहरीले अदालतबाट फैसला भई फरार रहेका सबै प्रतिवादीलाई पक्राउ गरी फैसला कार्यान्वयनमा सहयोग गर्ने अभियानलाई निरन्तरता दिने जनाएको छ।
Discussion about this post