बाँके, भदौ २ गते ।
नेपालगन्जका मुख्य सडक र चोकमा छाडा चौपायाको संख्या फेरि बढेको छ। व्यस्त सडकमा चौपाया जथाभावी हिँड्ने र सडकमै बस्ने गरेपछि सवारी आवागमन प्रभावित हुनुका साथै दुर्घटनाको जोखिम बढेको स्थानीयले बताएका छन्।
नागरिक सरोकार मञ्च बाँकेका संयोजक कृष्णप्रसाद श्रेष्ठले धम्बोझी चोक, सुर्खेत रोड, बीपी चोक, भेरी अस्पताल चोक, गणेशमान चोक, पुष्पलाल चोक, त्रिभुवन चोक र सदरलाइन क्षेत्रमा छाडा चौपायाको संख्या बढेको बताए। ‘छाडा चौपाया नियन्त्रणका लागि पटक–पटक आवाज उठाउँदै आएका छौं,’ उनले भने, ‘तर समस्या फेरि दोहोरिएको छ। नगरवासीले यसबाट कहिले मुक्ति पाउने भन्ने प्रश्न छ।’
उनका अनुसार सडकमा चौपायाको संख्या बढ्दा पैदलयात्रु र सवारी चालक दुवै जोखिममा छन्। रातिको समयमा सडकमा बसेका चौपाया नदेखिँदा दुर्घटनाको सम्भावना झनै बढ्ने उनले बताए।
नागरिक अगुवा डा. विनोद कर्णले पनि नेपालगन्जका व्यस्त बजार र चोकमा छाडा चौपाया बढ्दै गएको बताए। पटक–पटक नियन्त्रणको प्रयास भए पनि समस्या स्थायी रूपमा समाधान हुन नसकेको उनले बताए। ‘समस्या नयाँ होइन, पटक–पटक देखिँदै आएको हो,’ उनले भने, ‘नियन्त्रण गरिएका चौपाया फेरि सडकमा नआउने गरी दीर्घकालीन समाधान खोज्नुपर्छ।’
छाडा चौपायाको संख्या बढेपछि नेपालगन्ज उपमहानगरपालिकाले नियन्त्रण अभियान फेरि सुरु गरेको जनाएको छ। नगर क्षेत्रका विभिन्न स्थानबाट चौपाया नियन्त्रणमा लिएर नेपालगन्ज–२१ स्थित कान्जिहाउसमा पु¥याउन थालिएको उपमहानगरपालिकाले जनाएको छ।
नगर प्रमुख प्रशान्त विष्टले छाडा चौपायाका कारण नगरका विभिन्न क्षेत्रमा समस्या भएको गुनासो आएपछि नियन्त्रण अभियानलाई तीव्रता दिइएको बताए। उनका अनुसार पछिल्लो १५ दिनमा मात्रै १५० भन्दा बढी छाडा चौपाया नियन्त्रणमा लिएर कान्जिहाउसमा पु¥याइएको छ। ‘अहिले नियन्त्रणको काम चलिरहेको छ,’ उनले भने, ‘नगरका विभिन्न सडक र चोकबाट चौपाया उठाएर कान्जिहाउसमा राखिरहेका छौं।’
उपमहानगरपालिकाले यसअघि पनि पटक–पटक छाडा चौपाया नियन्त्रण गरेर कान्जिहाउसमा राख्दै आएको थियो। तर, बजार क्षेत्रमा पुनः चौपाया देखिन थालेपछि समस्या ज्यूँका त्यूँ रहेको छ।
नगरवासीले छाडा चौपाया नियन्त्रणसँगै पशुधनीलाई जिम्मेवार बनाउने र नियन्त्रणमा लिइएका चौपाया पुनः सडकमा नछाडिने व्यवस्था गर्न माग गरेका छन्। उनीहरूले तत्कालीन नियन्त्रणसँगै समस्या दोहोरिन नदिने दीर्घकालीन नीति आवश्यक रहेको बताएका छन्।
Discussion about this post