बाँके, भदौ ३ गते ।
बुद्ध एयरले नेपालगन्ज–पोखरा सिधा हवाई उडान भदौ ३१ गतेदेखि पुनः सञ्चालन गर्ने भएको छ। गत जेठ ५ गतेदेखि बन्द रहेको उडान करिब साढे तीन महिनापछि पुनः सञ्चालनमा आउन लागेको हो।
बुद्ध एयर नेपालगन्जका प्रमुख विनीतविक्रम शाहका अनुसार सेप्टेम्बर १६ अर्थात् भदौ ३१ गतेदेखि नियमित उडान सुरु हुनेछ। साताको आइतबार, बुधबार र शुक्रबार गरी तीन दिन उडान हुने उनले बताए।
शाहका अनुसार पछिल्लो समय यात्रुको माग बढ्न थालेपछि उडान पुनः सञ्चालन गर्ने निर्णय गरिएको हो। नेपालगन्जलाई पोखरासँग जोड्नुका साथै भारतको उत्तर प्रदेशबाट आउने यात्रुलाई समेत पोखरासम्म सिधा हवाई पहुँच दिने भएकाले यो उडानलाई महत्वपूर्ण मानिएको छ।
भारतबाट आउने धार्मिक पर्यटकको संख्या घटेको र इन्धन खर्च बढेका कारण जेठ ५ गतेदेखि उडान स्थगित गरिएको थियो। सुरुमा एक महिनाका लागि उडान रोक्ने सूचना जारी गरिएको भए पनि पुनः सञ्चालन हुन करिब साढे तीन महिना लागेको हो।
उडानका लागि बुकिङ खुला गरिएको शाहले बताए।
नेपालगन्ज–पोखरा उडान पुनः सञ्चालन हुने भएपछि बाँकेका पर्यटन व्यवसायी उत्साहित भएका छन्। पर्यटन प्रवद्र्धन मञ्च बाँकेका अध्यक्ष कृष्णप्रसाद श्रेष्ठले पश्चिम नेपाल र भारतका पर्यटकलाई पोखरासँग सिधा जोड्ने भएकाले उडान पर्यटन व्यवसायका लागि महत्वपूर्ण रहेको बताए।
उनका अनुसार उडान सञ्चालन भएपछि पोखरा र आसपासका नागरिकलाई नेपालगन्ज हुँदै बागेश्वरी मन्दिर तथा भारतको अयोध्यासहितका धार्मिकस्थलमा पुग्न सहज हुनेछ। त्यस्तै बाँके, बर्दिया, दाङ र सुर्खेतलगायत पश्चिम नेपालका नागरिकलाई पोखरा तथा मुस्ताङ पुग्न पनि सहज हुने उनले बताए।
स्थानीय पर्यटन व्यवसायीको पहलमा पर्यटन प्रवद्र्धन र भारतीय यात्रुलाई हवाई सेवामार्फत जोड्ने उद्देश्यले २०७८ साउन १७ गतेदेखि नेपालगन्ज–पोखरा सिधा उडान सुरु गरिएको थियो। सातामा तीन दिन सञ्चालन हुँदै आएको उक्त उडान यात्रुको माग र सञ्चालन खर्चलगायतका कारण पटक–पटक प्रभावित हुँदै आएको छ।
Discussion about this post