बाँके, असोज १० गते ।
बाँकेमा बिहीबारदेखि भइरहेको अविरल वर्षाका कारण राप्ती नदीमा पानीको सतह बढ्दै गएपछि तटीय क्षेत्रका बासिन्दा बाढी र कटानको जोखिममा परेका छन् ।
राप्ती नदीले राप्ती सोनारी गाउँपालिका–२ देखि नरैनापुरसम्मका तल्लोतटीय क्षेत्रमा वर्षेनी डुबान र कटान गर्दै आएको स्थानीयले बताएका छन् । स्थायी तटबन्ध नहुँदा नदीले कतै वारि र कतै पारितर्फ जमिन कटान गर्दै आएको राप्ती सोनारी–७ नयाँवस्ती फरेदागाउँका शङ्कर यादवले बताए ।
“अविरल वर्षासँगै नदीमा बाढी आइरहेको छ । स्थायी तटबन्ध नभएकाले जोखिम बढेको छ,” उनले भने, “ठूलो बाढी आए गाउँमा पस्ने डरले वर्षायाममा राति राम्ररी निदाउन सकिँदैन ।”
उनका अनुसार राप्ती सोनारी र नरैनापुरका तटीय क्षेत्रका करिब एक दर्जन बस्तीका सयौँ बासिन्दा बाढीको त्रासमा छन् । नदीले दिनहुँजसो खेतीयोग्य जमिन कटान गरिरहेको र अहिलेसम्म सयौँ बिघा जमिन कटानमा परिसकेको उनले बताए ।
राप्ती सोनारी–६ र ७ का सर्रा, भवानीयापुर, पहाडीपुर, वसन्तापुर, गेदवा, खल्ला झगडिया र देउपुर्वालगायत तथा नरैनापुरका गङ्गापुर, सोनवर्षा, कुदर–वेटवा र कुडुवालगायत बस्ती जोखिममा रहेको नरैनापुर–६ गङ्गापुरका अगुवा सोहनलाल यादवले बताए ।
“विसम्वरपुर र पदनाहानजिकको तटबन्ध केही वर्षअघि नदीले भत्काएको थियो,” उनले भने, “त्यसयता त्यही क्षेत्रबाट डुबान र कटान बढेको छ । स्थायी तटबन्ध नहुँदा ठूलो बाढी आउँदा नदी बस्तीमा पस्ने खतरा छ ।”
राप्ती सोनारी–२ कचनापुरको अगैया, गोबरपुर, माथेवास, खोरिया, मदुई, हरिहरपुर, अम्रहवा, टिकुलीपुर, शम्शेरगञ्ज र राजपुर तथा वडा नं. ३ को बैजापुरका विभिन्न टोलमा पनि वर्षायाममा डुबान र कटानको जोखिम रहने वडाध्यक्ष मिनकुमार चौधरीले बताए ।
“नदी किनारमा तटबन्ध नहुँदा हरेक वर्ष बाढीले दुवैतर्फको सयौँ बिघा खेतीयोग्य जमिन कटान गर्छ,” उनले भने, “वर्षासँगै नदीमा पानीको सतह बढिरहेकाले स्थानीयलाई सचेत गराइरहेका छौँ ।”
राप्ती सोनारी गाउँपालिका अध्यक्ष तप्त पौडेलले बाढी र डुबानको सम्भावनालाई ध्यानमा राखेर पालिकाले सतर्कता अपनाएको बताए । उनका अनुसार गाउँपालिकामा करिब एक हजार पाँच सयदेखि दुई हजार जनासम्मलाई राख्न सकिने पाँच वटा सुरक्षित आश्रयस्थल तयारी अवस्थामा राखिएको छ ।
“भारी वर्षापछि हुन सक्ने बाढी र डुबानलाई ध्यानमा राखेर आश्रयस्थल तयारी अवस्थामा राखेका छौँ,” उनले भने, “थप दुई वटा भवन निर्माण भइरहेका छन् ।”
Discussion about this post