बाँके असोज १५ गते ।
चाडपर्वलाई लक्षित गर्दै जिल्ला ट्राफिक प्रहरी कार्यालय बाँकेले सार्वजनिक सवारीसाधनमा राखिएका अतिरिक्त सिट तथा मुढा हटाउन थालेको छ। यात्रुको सुरक्षित, मर्यादित र भरपर्दो यात्रा सुनिश्चित गर्ने उद्देश्यले प्रहरीले राँझामा विशेष चेकजाँच गरेको हो।
बुधबार दिउँसो ३ देखि ५ बजेसम्म नेपालगन्ज उपमहानगरपालिका–२० राँझास्थित रत्न राजमार्गमा गरिएको चेकजाँचका क्रममा १७१ वटा सवारीसाधन जाँच गरिएको जिल्ला ट्राफिक प्रहरी कार्यालय बाँकेले जनाएको छ।
प्रहरी नायब निरीक्षक दीपकराज गिरीको कमान्डमा सिभिल प्रहरीसहित ८ जनाको टोली खटाइएको थियो। चेकजाँचका क्रममा सार्वजनिक सवारीसाधनमा राखिएका ६२ वटा अतिरिक्त सिट तथा मुढा हटाइएको प्रहरीले जनाएको छ।
यस्तै, विभिन्न ट्राफिक नियम उल्लंघन गरी सञ्चालनमा रहेका ३५ वटा सवारीसाधनलाई कारबाही गरिएको जिल्ला ट्राफिक प्रहरी कार्यालय बाँकेले जनाएको छ।
जिल्ला ट्राफिक प्रहरी कार्यालय बाँकेका प्रमुख प्रहरी निरीक्षक कनकबहादुर शाहीले चाडपर्वका बेला सार्वजनिक सवारीसाधनमा यात्रुको चाप बढ्ने भएकाले क्षमताभन्दा बढी यात्रु बोक्ने प्रवृत्तिले यात्रा असुरक्षित बन्न सक्ने बताए।
‘सार्वजनिक सवारीसाधनमा अतिरिक्त सिट र मुढा राखेर यात्रु बोक्दा यात्राको सहजता र सुरक्षामा असर पर्न सक्छ,’ उनले भने, ‘चाडपर्वका बेला यात्रुको सुरक्षित र मर्यादित यात्रा सुनिश्चित गर्न ट्राफिक प्रहरीले चेकजाँचलाई कडाइ गरेको हो।’
शाहीले सवारीधनी र चालकलाई सवारीसाधनमा राखिएका वैकल्पिक सिट तथा मुढा आफैं हटाउन आग्रह गरे। यात्रुको सुरक्षाका लागि ट्राफिक प्रहरीसँग सहकार्य गर्न उनले सबैलाई अनुरोध गरे।
चाडपर्वका बेला लामो तथा छोटो दूरीमा चल्ने सार्वजनिक सवारीसाधनमा यात्रुको चाप बढ्ने भएकाले अतिरिक्त सिट तथा मुढा राख्ने गरिएको प्रहरीको भनाइ छ। यस्तो अभ्यासले यात्रुलाई असहज र असुरक्षित हुने भएकाले अभियान सञ्चालन गरिएको प्रहरीले जनाएको छ।
जिल्ला ट्राफिक प्रहरी कार्यालय बाँकेले ट्राफिक नियम पालना गरी सवारी सञ्चालन गर्न चालक तथा सवारीधनीलाई आग्रह गरेको छ। साथै, सुरक्षित यात्राका लागि सञ्चालन गरिएको अभियानमा सहयोग गर्नसमेत प्रहरीले अनुरोध गरेको छ।
Discussion about this post