बाँके असोज २२ गते ।
नेकपा (एमाले) बाँके जिल्ला कमिटी सदस्य रचना श्रेष्ठले पार्टीको साधारण सदस्यसमेत नरहने गरी एमालेबाट अलग भएको घोषणा गरेकी छन्। उनले अब राष्ट्रिय प्रजातन्त्र पार्टी (राप्रपा) मार्फत राजनीतिक यात्रा अघि बढाउने बताएकी छन्।
श्रेष्ठले बिहीबार सामाजिक सञ्जाल फेसबुकमा लामो स्टाटस लेख्दै एमालेको जिल्ला कमिटी सदस्यसहित पार्टीको सम्पूर्ण साधारण सदस्यताबाट अलग हुने निर्णय गरेको बताएकी हुन्।
श्रेष्ठका अनुसार उनी २०५८ सालदेखि एमालेको संगठनात्मक संरचनामा रहेर बाँके जिल्ला कमिटी सदस्यका रूपमा पार्टी संगठन निर्माण र जनताको सेवामा क्रियाशील रहँदै आएकी थिइन्।
पार्टीमा रहँदा बाँकेवासी, अग्रज नेता, सहकर्मी तथा आम कार्यकर्ताबाट प्राप्त स्नेह, विश्वास र सहयोगप्रति उनले आभार व्यक्त गरेकी छन्।
परिवर्तित राष्ट्रिय राजनीतिक परिवेश, मुलुकको वर्तमान अवस्था, सनातन धर्म–संस्कृति, राष्ट्रियताको रक्षा तथा बाँकेको सर्वपक्षीय विकासका विषयमा आफ्ना वैचारिक प्राथमिकता र राजनीतिक दिशाबारे पुनर्विचार गर्नुपर्ने आवश्यकता महसुस भएको उनले बताएकी छन्।
‘आफ्नो वैचारिक निष्ठा र राष्ट्रिय राजनीतिप्रतिको दृष्टिकोणलाई अझ स्पष्ट र प्रभावकारी बनाउन’ एमालेबाट अलग हुने निर्णयमा पुगेको उनले उल्लेख गरेकी छन्।
अब राप्रपामार्फत राष्ट्रियता, प्रजातन्त्र, सनातन धर्म–संस्कृतिको संवद्र्धन तथा बाँकेको समृद्धिका लागि सक्रिय रहने श्रेष्ठले बताएकी छन्।
एमालेमा रहँदा अग्रज नेताहरूबाट प्राप्त मार्गदर्शन र सहकर्मीसँग बिताएका रचनात्मक क्षणहरू सधैं स्मरणीय रहने उनले बताएकी छन्।
राजनीतिमा फरक–फरक बाटो र विचार हुन सक्ने भए पनि देश, जनता र बाँकेको विकासप्रतिको साझा संकल्पमा आफूहरू सहयात्री रहने विश्वास उनले व्यक्त गरेकी छन्।
आफूलाई अहिलेसम्म साथ, सहयोग र मार्गदर्शन गर्ने अग्रज, सहकर्मी तथा बाँकेका जनसमुदायप्रति श्रेष्ठले धन्यवादसमेत व्यक्त गरेकी छन्।
Discussion about this post