बाँके, असोज २२ गते ।
नेपाली कांग्रेसको १५औँ महाधिवेशनअन्तर्गत बिहीबार नयाँ केन्द्रीय कार्यसमिति चयनका लागि मतदान हुँदैछ। महाधिवेशनमा बाँकेबाट विभिन्न क्लस्टरतर्फ नौ जना नेताले केन्द्रीय सदस्य पदमा उम्मेदवारी दिएका छन्।
बाँकेबाट कांग्रेस जिल्ला सचिव सुधांशु कोइराला, निवर्तमान केन्द्रीय सदस्य मैकुलाल वाल्मिकी, लुम्बिनी प्रदेशका पूर्वमन्त्री सुरेन्द्र हमाल, लक्ष्मीनारायण शाह, कमला हमाल, दुःखीराम लोनिया र बबिता शाहीसहित नौ जनाले उम्मेदवारी दिएको जिल्ला सचिव कोइरालाले बताए।
बाँकेबाट उम्मेदवारी दिएका अन्य दुई नेताको नामसमेत विभिन्न क्लस्टरको सूचीमा परेको उनले बताए। ‘बाँकेबाट नौ जनाले विभिन्न क्लस्टरतर्फ केन्द्रीय सदस्यमा उम्मेदवारी दिएका छन्,’ कोइरालाले भने।
बाँकेबाट महाधिवेशन प्रतिनिधिका रूपमा सहभागी रमेश गुप्ताले जिल्लाबाट उम्मेदवार बनेका नेताहरूलाई जिताउन प्रतिनिधिहरूले प्रचारप्रसार गरिरहेको बताए। ‘जिल्लाबाट नौ जना उम्मेदवार हुनुहुन्छ। सकेसम्म धेरै उम्मेदवारलाई विजयी गराउन हामीले प्रयास गरिरहेका छौं,’ उनले भने।
कांग्रेसको १५औँ महाधिवेशनमा बाँकेबाट १२६ जना महाधिवेशन प्रतिनिधि मतदाताका रूपमा सहभागी छन्। जिल्ला सचिव कोइरालाका अनुसार क्षेत्र नम्बर १ बाट ४७, क्षेत्र नम्बर २ बाट ३९ र क्षेत्र नम्बर ३ बाट ४० जना महाधिवेशन प्रतिनिधि छन्।
बाँकेबाट महाधिवेशनमा सहभागी सबै प्रतिनिधिले बिहीबार तोकिएको मतदान केन्द्रमा पुगेर केन्द्रीय कार्यसमिति चयनका लागि मतदान गर्ने कांग्रेस बाँकेले जनाएको छ।
निर्वाचन समितिले राष्ट्रिय सभागृह, खुलामञ्च र प्रज्ञा भवनमा मतदान केन्द्र तोकेको छ। लुम्बिनी प्रदेशका महाधिवेशन प्रतिनिधिका लागि प्रज्ञा भवनमा मतदान केन्द्र तोकिएको केन्द्रीय सदस्यका उम्मेदवार एवं लुम्बिनी प्रदेशका पूर्वमन्त्री सुरेन्द्र हमालले बताए। ‘लुम्बिनी प्रदेशका लागि प्रज्ञा भवनमा मतदान केन्द्र तोकिएको छ,’ उनले भने।
Discussion about this post