बाँके मंसिर ११ गते ।
बाँकेमा शिवशिखर बहुउद्देश्यीय सहकारी संस्थाले ठगी गरेको जनाउँदै तीन हजार ३०० जनाले जिल्ला प्रहरी कार्यालयमा उजुरी दर्ता गरेका छन् । जिल्ला प्रहरी कार्यालय बाँकेका सूचना अधिकारी डिएसपी नारायण डाँगीका अनुसार हालसम्म शिवशिखरविरुद्ध ठगीको उजुरी गरेकाहरूले ४८ करोड ७८ लाख ६४ हजार बिगो दाबी गरेका छन् ।
डिएसपी डाँगीले ५ हजारदेखि ७३ लाख रुपियाँसम्म ठगिएको भन्दै उजुरी प्राप्त भएको बताए । उनले अगाडि थपे–‘केन्द्रीय अध्यक्षसहित नौ जनाविरुद्ध उजुरी परेको छ । हामीले यो विषयमा गम्भीरतापूर्वक अनुसन्धान गरिरहेका छौँ ।’ उनका अनुसार पहिलो चरणमा उजुरी आह्वान गरिएकोमा उजुरी प्राप्त भएको छ भने अब थप अनुसन्धान भइरहेको छ ।
बाँकेमा नेपालगन्जको न्युरोड र कोहलपुर लगायतका ठाउँमा शाखा खोलेर शिवशिखरले कारोबार गर्दैआएको छ । बचत फिर्ता गर्न नसकेपछि उक्त सहकारीमा तालाबन्दी गरिएको छ । ठुलो आर्थिक अपचलन भएपछि अहिले सो सहकारी टाट पल्टेको बताइएको छ । बचतकर्ताको लाखौँ करोडौँ रुपियाँ गुम्ने भन्दै बचतकर्ता आन्दोलनमा उत्रेका छन् । आर्थिक अनियमिततासँगै कारोबार डामाडोल भएपछि यतिबेला नेपालगन्जको न्युरोडमा सहकारीमार्फत सञ्चालित शिवशिखर मार्ट र कार्यालयमा ताला लगाइएको छ ।
सुनौलो भविष्यका लागि आफूहरूले खाइनखाई कमाएर जम्मा गरेको पैसा सहकारीले फिर्ता नगरेपछि बाध्य भएर आन्दोलनमा उत्रिनुपरेको बचतकर्ताको भनाइ छ ।कोहलपुर–१ का विक्रम खड्काले वर्षौँ लगाएर जम्मा गरेको रकम आवश्यक परेका बेला झिक्न नसकेको बताउनुभयो । शिवशिखर सहकारी संस्थाका केन्द्रीय कार्यालय भक्तपुरमा छ । यो सहकारीले २०६९ असोज २८ गते सहकारी विभागबाट दर्ता प्रमाणपत्र पाएको थियो ।
भक्तपुरको कौशलटारमा मुख्य कार्यालय रहेको सहकारीका देशभर ३३ भन्दा बढी शाखा छन् । उक्त सहकारी संस्थाले देशका विभिन्न स्थानमा ‘गार्डेन मार्ट डिपार्टमेन्टल स्टोर’ चलाएको छ । शिवशिखर सहकारीमा सामान्य आम्दानी भएका, साना व्यवसायी, अटोरिक्सा चालकलगायत मध्यमस्तरका व्यवसायीले बचत गर्दैआएका थिए । पैसा नपाउँदा उनीहरू निराश छन् ।
Discussion about this post