बाँके मंसिर ११ गते ।
बाँकेका प्रमुख जिल्ला अधिकारी (सिडिओ) श्रवणकुमार पोखरेलले कसैले चाहेर पनि अवैध तस्करी रोक्न नसक्ने बताएका छन् । खुल्ला सीमानाका कारण अवैध चोरी नियन्त्रण गर्न नसकिने उनको भनाई छ ।
१३ औँ अन्तर्राष्ट्रिय कर दिवसको अवसरमा नेपालगन्जमा आयोजित एक कार्यक्रममा उनले दशगजाको वरिपरि दुई देशका नागरिकको वस्ती भएकोले अवैध तस्करी नियन्त्रण गर्न कठिनाई भएको दावी गरे । उनी अवैध तस्करी नियन्त्रणमा लाग्नुभन्दा खुल्ला सीमानाको बहाना बनाएर यसबाट बञ्छिन खोजेको जस्तो देखिन्छ । ‘नरैनापुरमा जानु भयो भने दशगजासँगै जोडिएर दुई देशका नागरिकले घर बनाएका छन् । त्यहाँ तरकारी पनि साटासाट गर्छन् । को कुन देशको हो भनेर चिन्न समेत सकिदैन, अनि कसरी गर्न सकिन्छ तस्करी नियन्त्रण ?,’ सिडिओ पोखरेलले भने ।
उनले अवैध तस्करी रोक्ने प्रतिवद्धता जनाउनुभन्दा अवैध तस्करी नियन्त्रण गर्न सीमामा बसेका सशस्त्र प्रहरीको बचाउ गरेका छन् । उनले सशस्त्र प्रहरीले सीमामा हुने अवैध तस्करी रोक्न सम्भव नभएको बताउँछन् । ‘सशस्त्र प्रहरीले पनि कता–कता हेरोस्, कता–कता हेर्न भ्वास् । सवैतिर हेर्न भ्याउने कुरा पनि हुँदैन,’ उनले भने ।
सिडिओ पोखरेलले भारतबाट हुने अवैध तस्करी नियन्त्रणका लागि सीमामा खटिएका सशस्त्र प्रहरीले गरेका कालाकर्तुतको समेत बचाउ गरेका छन् । यसले सशस्त्र प्रहरीलाई तस्करसँग मिलेर मोटो रकम असुल्न थप जोडवल मिलेको छ । ‘सशस्त्र प्रहरीले तस्करसँग मिलेर मोटो रकम लिएको भन्ने पनि सुनिन्छ । तर यसको ठोस प्रमाण मसँग छैन । प्रमाण नहुँदै सशस्त्र प्रहरीले तस्करसँग मिलेर मोटो रकम खायो भनेर कसरी भन्न सक्छु,’ उनले भने ।
उनले चोरी, तस्करीको विषयमा नेपालगन्जका ब्यापारीको फरक–फरक धारणा आउने गरेको जिकिर गरे । एउटाले अवैध रुपमा सामान ल्यायो भन्नुहुन्छ, अर्कोले होइन त्यसले तस्करी गरेको छैन, त्यसको सामान छोड्नु पर्यो भन्दै दवाव दिनुहुन्छ । सवैको समान धारणा आउनु पर्यो,’ सिडिओ पोखरेलले भने ।
नेपालगन्ज उद्योग बाणिज्य संघको कार्यक्रममा कडा रुपमा प्रस्तुत भएका उनी तस्कर र तस्करीलाई संरक्षण दिँदै आएका सशस्त्र प्रहरीको भने बचाउ गरे । उनले अवैध तस्करी नियन्त्रण नभएको भन्दै सशस्त्र प्रहरीलाईमात्र दोष नदिन र गाली नगर्न आग्रह गरे । ‘अवैध तस्करी नरोकिनुमा सशस्त्र प्रहरीकोमात्र दोष छैन । यसमा हामी पनि उत्तिकै दोषि छौँ । सशस्त्र प्रहरीले एक्लै के नै गर्न सक्छ र ?’ उनले बारम्बार सशस्त्र प्रहरीको बचाउ गर्दै भने, ‘अवैध तस्करी नियन्त्रण नगरेको भन्दै सशस्त्र प्रहरीलाईमात्र दोष नदिई तपाई, हामी सवै हातेमालो गरेर अगाडी बढ्नुको विकल्प छैन ।’
नेपाल सरकारले सीमामा हुने अवैध तस्करी रोक्ने जिम्मा सशस्त्र प्रहरीलाई दिएको छ । गृहमन्त्री नारायणकाजी श्रेष्ठले सीमामा हुने अवैध तस्करी नियन्त्रणमा कुनै कसुर बाँकी नराख्न र कुनै कमिकमजोरी गरे कारवाहीको भागिदार हुनुपर्ने स्पष्ट पारेका छन्, तर गृहमन्त्रीकै धज्जी उडाउँदै सीमामा खटिएका सशस्त्र प्रहरीले तस्करसँग मोटो रकम लिएर अवैध सामान नेपालगन्ज पुर्याउन सहयोग गर्दै आएका छन् । सशस्त्रले तस्करसँग खुलेआम रकम माग्दा समेत बाँकेका सिडिओ पोखरेल उसैको बचाउ गर्नुमा उनको पनि मिलोमतो छ भन्ने आशंका उब्जिएको छ ।
Discussion about this post