सरला सुवेदी
बाँके मंसिर २२ गते ।
बाँकेको चपरगौडिबाट खड्कवार–घुइँयाबारी हुँदै सल्यान जोड्ने अन्तरप्रदेश पर्यटकीय मार्गलाई बाँके राष्ट्रिय निकुञ्जले अवरोध गरेको छ ।वि.सं २०१५ देखि नै यस सडकलाई चुनावी नारा बनाएका राजनीतिक दलले यो सडक निर्माण गर्न सडक देखि संसदसम्म विरोध पर्दशन गर्ने प्रतिबद्धता जनाएका छन् ।
आज कोहलपुर नगरपालिकाको १२ र १३ वडाले संयुक्त रुपमा आयोजना गरेको भेलामा बोल्दै अधिकांश व्यक्तिहरुले निकुञ्जले गरेको अवरोधको विरोध जनाएका थिए ।
करिब एक दर्जन भन्दा बढि बोल्ने स्थानियहरुले निकुञ्जले गरेको व्यवहारलाई लिएर निकै आक्रोस समेत भएका थिए । चपरगौडिदेखि खड्कवार थारुगाउँसम्म ४ खण्डमा विभाजन गरी टेन्डर सम्झौता भएको छ ।
४ वटा निर्माण कम्पनीले चपरगौडिदेखि खड्कवार थारु गाउँसम्म सडक निर्माण गर्न ८ करोड ५० लाखमा सम्झौता भएको कोहलपुर नगरपालिकाका कार्यवहाक नगर प्रमुख तथा वडा नं. १२ का वडा अध्यक्ष विरेन्द्र कुमार शाहले जानकारी दिनुभएको छ।
उहाँका अनुसार कोहलपुर नगरपालिका वडा नं १२ र १३ लगायत कोहलपुरलाई आर्थिक तथा सामाजिक रुपले सबल बनाउन कोहलपुर–चपरगौडी–खडकवार–घुइँयाबारी हुँदै सल्यान जोड्ने अन्तरप्रदेश पर्यटकीय मार्ग बनाउन जरुरी रहेको बताउनुभयो ।
यस्तै कोहलपुुर नगरपालिका वडा नं. १३ का वडा अध्यक्ष डम्बर बहादुर खड्काले सेक्टर वन कार्यालयले अनुमति नलिई काम गरेको भन्दै अवरोध गर्छ तर निकुञ्जले भने अनुमति दिँदैन भन्दै आक्रोस पोख्नुभएको थियो।
लुम्बिनी प्रदेश सभा सदस्य दुर्गा प्रसाद चौधरी र सञ्जु कुमारी चौधरीले टेण्डर भएको स्थानसम्म काम गर्ने अनुरोध गर्दै टेन्डर भएको सडकखण्डमा निकुञ्जले अवरोध गरेको भए त्यो गलत भएको जिकिर गरेका छन् ।
टेन्डर पक्रियाबाट छनौट भएका निर्माण व्यवसायीहरुलाई विभिन्न बहानामा काममा अवरोध ल्याउने काम भएको भए सरासर गलत भएको उनीहरुको निष्कर्ष थियो ।
समन्वय र सहकार्य समिति गठन
चप्परगौडीबाट खड्कवार–घुइँयाबारी हुँदै सल्यान जोड्ने अन्तरप्रदेश पर्यटकीय मार्गलाई बाँके राष्ट्रिय निकुञ्जसंग समन्वय र सहकार्यका लागि समिति गठन भएको छ ।
आज भएको भेलाबाट वडा नं. १२ का वडा अध्यक्ष विरेन्द्र कुमार शाहको अध्यक्षतामा १२ सदस्यीय समिति गठन भएको छ ।
जसमा नेकपा एमालेका क्षेत्रिय संयोजक बलराम भट्टराई, वडा नं. १३ का डम्बर खड्का, नेकपा माओवादी केन्द्रका वडा अध्यक्ष निरक बहादुर शाही, राष्ट्रिय प्रजातन्त्र पार्टीका कोहलपुरका सल्लाहाकार चक्र बहादुर केसी, नेकपा एमालेका वडा अध्यक्ष रुपसिंह डाँगी, राष्ट्रिय स्वतन्त्र पार्टीका प्रतिनिधि मेन बहादुर देवकोटा, कोहलपुर मध्यवर्ती क्षेत्र विकास समितिका अध्यक्ष ओम प्रकाश वली, नेकपा एसकी जिल्ला कमिटि सचिवालाय सदस्य नारायणी वली, नेपाली काँग्रेस १२ का वडा सभापति केश कुमारी वली र राष्ट्रिय जनमोर्चाका वडा अध्यक्ष रुद्रनाथ आचार्य रहेका रहेका छन्
Discussion about this post