ट्राफिक लाइट छिटो संचालनमा ल्याउन पूर्व मन्त्री राईको आग्रह

बाँके माघ २५ गते ।
नेपालगन्ज उपमहानगरपालिकाको ब्यस्त चोकमा ट्राफिक लाइट जडान भई संचालनमा आउने तयारी गरिएको छ । मोहम्मद इस्तियाक राई भौतिक पूर्वाधार तथा यातायात मन्त्री भएको पालामा आएको ट्राफिक लाइट योजना बल्ल कार्यान्वयनमा आउन लागेको हो ।

नेपालगन्जको गणेशमान चोक, विपी चोक, धम्बोझी चोक, पुष्पलाल र राँझा चोकमा ट्राफिक लाइट जडान गरिएको छ ।
पूर्व मन्त्रि राईले संघीय संसदको निर्वाचन अघि ट्राफिक लाइटको शिलान्यास गरेका थिए । उनले चुनाव अघि नै संचालनमा ल्याउने प्रयास गरे पनि विविध कारणले जडान गर्न ढिलाई भएको थियो ।

उनले पहिले नै संचालनमा आउनु पर्ने ट्राफिक लाइट भर्खर संचालनमा ल्याउनु दुर्भाग्य भएको बताए । ‘एक वर्षअघि शिलान्याश भएको योजना ढिलो गरि संचालनमा ल्याउनु दुर्भाग्य मान्नु पर्छ,’ उनले भने ।
उनले वजेट सुनिशिचततासहित ट्राफिक लाइटको योजना ल्याएको बताए । ‘मैले त वजेट सुनिश्चितासहित योजना ल्याएँ, तर योजना कार्यान्वयमा के कारणले ढिलाई भएको हो । यसमा मेरो कुनै दोष छैन । कार्यान्वयनमा किन ढिलाई भयो त्यो सम्बन्धित निकायलाई सोध्नु पर्छ,’ उनले भने ।

उनले सांसद र उपमहानगरका जनप्रतिनिधिका कारण ढिलाई भएको बताए । उनले छिट्टै संचालनमा ल्याउन माग गरेका छन् । ‘जनतासँग प्रत्यक्ष सरोकार राख्ने ट्राफिक लाइट संचालन गर्नु ढिलाई गर्न हुँदैन । जतिसक्दो चाँडो संचालनमा ल्याउनु पर्यो,’ उनले भने ।