बाँके चैत ९ गते ।
भारतले पश्चिम तराईसँग सीमा जोडिएका अध्यागमन कार्यालयबाट विदेशीलाई दिदै आएको सुविधा तीन वर्षदेखि वन्द छ । त्यसको असर पश्चिमको पर्यटकीय क्षेत्रमा परेको छ भने बाँके, कैलाली र कंचनपुरका अध्यागमन कार्यालय बेकामे बनेका छन्। पश्चिम नेपालको प्रमुख नेपालगन्ज भन्सार नजिकै रहेको अध्यागमन कार्यालय विहान १० देखि बेलुका ५ वजेसम्म खुल्छ ।
प्रमुखसहित सात जना कर्मचारी हाजिर लगाउँछन् र कार्यालय कुरेर बस्छन् । २०७६ सालदेखि सुरु भएको योक्रम अहिलेपनि चलिरहेको छ । तर गृह मन्त्रालय र मातहतको अध्यागमन विभागले यो नाका हुँदै पश्चिम नेपालको भ्रमण गर्न चाहने विदेशीलाई भित्र्याउने सवालमा न भारतीय पक्षसँग छलफल गरेको छ न त अपेक्षित चासो नै देखाएको छ ।
कार्यालय प्रमुख दुर्गाकुमारी वलीका अनुसार रुपैडियामा रहेको भारतीय अध्यागमन कार्यालयको अनलाइन सिस्टम नियमित नभएका कारण त्यसको प्रभाव पश्चिम नेपालको पर्यटकीय क्षेत्रमा पनि परेको हो । व्यापारिक र पर्यटकीय क्षेत्रको प्रमुख मार्ग भएकाले सरकारले २०४७ चैत १० गते नेपालगन्जमा अध्यागमन कार्यालय स्थापना गरि भारतको बाटो नेपाल यात्रामा आउन र स्वदेश फर्किन चाहाने विदेशीलाई अध्यागमन सम्वन्धी सेवा दिँदै आएको थियो ।
नेपालगन्ज हुँदै वर्सेनि एक हजारको हाराहारीमा विदेशीहरु आउने जाने गरेका थिए । तीमध्ये धेरैजसो अमेरिकी भएको अध्यागमन कार्यालयको भनाइ छ । तर पहिले कोरोना संक्रमणको कारण वन्देज लगाएको भारतले अहिले इन्टरनेट जडान नभएको कारण देखाउँदै यात्रा अनुमति दिन नसकिएको भन्दै आएको छ । अध्यागमन कार्यालयका वरिष्ठ सहायक किस्ना रानाले बताइन् ।
यस्तै छ कैलालीको मोहना नजिकै रहेको अध्यागमन कार्यालयको हविगति पनि । सधै सुनसान देखिने यहाँको अध्यागमन कार्यालयमा पनि कर्मचारीहरु आउने, हाजिर लगाउने र फर्किने गरेका छन् । यी मार्ग हुँदै कंचनपुरको गड्डा चौकी हुँदै सन् २०२३ मा ९२३ जना विदेशी पर्यटक भित्रिएको अभिलेख छ ।
त्यसैगरी ७ जना बाहिरिएका थिए । सन् २०२४ को दुई महिनामा २१६ जना विदेशी भित्रिदा दुई जना बाहिरिएका छन् । बाहिरिनेमा बंगलादेश अध्ययन गर्न जाने विद्यार्थी भएको कार्यालयको भनाइ छ । सहजरुपमा विदेशी भित्र्याउन सकिने यस्ता नाकाहरु खोल्न सरकारले चासो दिनुपर्ने पर्यटन व्यवसायीहरु बताउँछन् । नेपाल एशोसिएसन अफ द टुर एण्डा ट्राभल एजेन्ट्स प्रमुख पदवविक्रम सिंहले सरकारी उदासिनताका कारण पर्यटन व्यवसाय समेत प्रभावित भएको बताउँछन् ।
Discussion about this post