बाँके चैत २७ गते ।
नेपालगन्ज भन्सार सुरक्षाका लागि खटिएका सशस्त्र प्रहरीका डिएसपीले मादक पदार्थ सेवन गरि महिलामाथि दुर्ब्यवहार गरेको आरोप लागेको छ । विवाहको सामान किनेर रुपइडिहाबाट फर्किने क्रममा मादक पदार्थ सेवन गरेका सशस्त्र प्रहरीका डिएसपीले भन्सारमा आफूलाई दुर्ब्यवहार गरेको कोहलपुरकी सम्झना शर्माले आरोप लगाइन् ।
मामाको छोरीको विवाहका लागि सामान ल्याउँदै गर्दा सशस्त्रका डिएसपीले आफूमाथि हातपात समेत गरेको उनले अनलाइन खोजखवरसँग बताइन् । ‘विवाहको कपडा ल्याउँदै थियौँ । मादक पदार्थले लठिएका सशस्त्रका डिएसपीले म माथि हात लगाए ।
विवाहको कार्ड देखाउँदासमेत सामान जवरजस्ती खोसेर लगियो । भन्सार गर्न समेत छुट दिइएन,’ आक्रोश पोख्दै उनले भनिन्, ‘पहुँच वालालाई नलाग्ने हामी जस्ता निमुखालाई मात्र लागू हुने हाम्रो देशको कस्तो कानुन हो ?’
उनले सशस्त्र प्रहरीले नाकामा आतंक मचाएको बताइन् ।
जमुनाह नाकामा खटिएका सशस्त्र प्रहरीहरु गुण्डा शैलीमा प्रस्तुत हुने गरेको बताउँदै उनले भन्सार गर्छु भन्दा पनि नमान्ने डिएसपीलाई कारवाही गर्न माग गरिन् । ‘मैले सित्तैमा लग्दैन । राज्यले निर्धारण गरेको भन्सार शुल्क तिर्छु भन्दा पनि दादागिरी शैलीमा सामान नियन्त्रणमा लिएर गए,’ उनले भनिन्, ‘जनताले तिरेको राजस्वबाट तलव खाइरहेकाहरुले नै जनतामाथि दमन गर्नु हास्यास्पद हो । यसमा मेरो घोर आपत्ति छ ।’
उनले सामान ल्याउँदै गर्दा नाकामा खटिएका सशस्त्र प्रहरीका जवानलाई विवाहको कार्ड देखाइन् । चेकजाँचमा खटिएका सशस्त्र प्रहरीका जवानले जान स्विकृति दिए, तर मादक पदार्थ सेवन गरि सिभिल ड्रेसमा रहेका डिएसपीले सामान लैजान पाइदैन भन्दै लछारपछार गरेको शर्माले बताइन् ।
‘चेकजाँच गरिरहेका सशस्त्रका जवानले कार्ड हेरेर जानुस भने, तर मादक पदार्थ सेवन गरेका सिभिल ड्रेसमा रहेका डिएसपीले सामान खोसेर हामीलाई लछारपछार गर्दै हुत्याए,’ उनले भनिन्, ‘प्रहरी महिलाले मात्र महिलालाई छुन र केरकार गर्न पाइन्छ । पुरुष प्रहरीले लछारपछार गरेर मेरो इज्जतमाथि खेलवाड गरेको मेरो बुझाई छ । ति डिएसपीलाई कारवाहीको दायरामा ल्याउनु पर्छ भन्ने मेरो माग छ ।’
मादक पदार्थ सेवन गरेका सशस्त्र प्रहरीका डिएसपीले धम्की समेत दिएको उनले बताइन् । ‘इन्डियाबाट सामान ल्याउन पाइदैन तिमीहरुलाई नेपालको कानुन थाहा छैन भन्दै धम्क्याए । लछारपछार गरे । सिभिलमा रहेका डिएसपीले मास्क लगाउनु भएको थियो । तै पनि रक्सीको गन्ध आइरहेको थियो,’ ति महिलाले भनिन्, ‘मानवीयता गुमाएर हामी महिलामाथि लछारपछार गर्नुभयो ।’
मादक पदार्थमा मातिएका डिएसपी एकहोरो बोलेर आफुलाई तथानाम गाली गरेको उनको भनाई छ । डिएसपीको हर्कत देखेर वरिपरि रहेका सर्वसाधारण समेत चकित परेको उनले जिकिर गरिन् ।
चेकजाँचमा खटिएका सशस्त्र प्रहरीका एक जवानले भने, ‘डिएसपी सावले मादक पदार्थ सेवन गरे, नगरेको मलाई जानकारी भएन, तर उहाँले जुन ब्यवहार गर्नु भयो त्यो ठिक थिएन ।’
घटनाबारे अनलाइन खोजखवरले बुझ्न खोज्दा डिएसपीले एक पटक फोन उठाए, तर कुराकानी हुँदै गर्दा फोनको लाइन काटे । घटनाको बारेमा बुझ्न पटक–पटक फोन गर्दा समेत उनको नउठेका कारण घटना बारे विस्तृत कुरा बाहिर ल्याउन अनलाइन खोजखबर असमर्थ भएको छ ।
Discussion about this post