बाँके चैत २९ गते ।
अरबी पात्रोअनुसार दसौँ महिनाको पहिलो दिन बिहीबार बाँकेका मुस्लिम समुदायले नेपालगन्जस्थित विपी चोकस्थिल विशेष नमाज पाठ गरी ठूलाबडाबाट आशीर्वाद लिएका छन् । ईद उल फित्र (ईद) पर्वको अवसरमा विहानै इदगाहमा भेला भएका ठूलो संख्याका इस्लाम धर्मावलम्वीले विशेष नमाज पाठ गरिसकेपछि एक आपसमा अंकमाल गरि शुभकामना आदान प्रदान गरे ।
खुसीपूर्वक शरीरको दान गरेर दिनदुःखी एवम् गरिबलाई बाँडिने भएकाले यो पर्वलाई इद–उल–फित्र भनिएको धार्मि गुरु मौलाना जब्बार मञ्जरीले बताए । अरबी पात्रोअनुसार नवौँ महिनाको अन्तिम दिन बेलुकी चन्द्रमा देखिएपछि भोलिपल्ट ईद–उल–फित्र मनाउन लागिएको उनले बताए ।
‘दशौँ महिनाको पहिलो दिनलाई शौवाल भनिन्छ, पश्चिम एसियाली मुलुकमा मङ्गलबार चन्द्रमा देखियो । नेपालमा बुधबार चन्द्रमा देखिएकोले बिहीबार ईद–उल–फित्र पर्व मनाइएको मुस्लिम अगुवा अब्दुल हमिद सिद्धिकी (भोला) ले बताए । यो पर्वमा जुनसुकै वर्गका मुस्लिमले पनि यो मिठो मसिनो खाई मनाउने गरिन्छ ।
यस पर्वमा मुस्लिम धर्मावलम्बीले एक वर्षभित्रको बचत, साढे सात तोला सुन वा ५२ तोला चाँदी भए त्यस बराबर चालु बजार भाउ अनुसारको साढे दुई प्रतिशत नगद वा जिन्सी दान गर्नुपर्ने विधान मुस्लिम धर्मग्रन्थ कुरानमा उल्लेख छ । यसरी दान गरिएको नगद वा जिन्सी दीनदुःखी एवम् गरिबलाई बाँडिन्छ । यसलाई जकात भनिन्छ ।
ईद उल फित्रमा प्रत्येक व्यक्तिले आफ्नो गच्छेअनुसार गहुँ वा सो बराबरको नगद दान गर्छन् जसलाई सत्कार फितर भनिन्छ । यो दान आमाको पेटमा आएको बच्चाको पनि गरिनुपर्छ भन्ने नियम छ । यो दान पनि दीनदुःखी र गरिबलाई नै दिइन्छ । इद उल फितरको बिहान सूर्योदयअघि पढिने नमाजलाई फजर भनिन्छ । हातमुख (ओजु) धोएर फजर नमाज पढिन्छ ।
स्नान गरेर नयाँ कपडा पहिरिएर इदगाह पुगेका बाँकेका इस्लाम धर्मावलम्वीले विधि पुर्वक नमाज पाठ गरेका थिए । अहिले घरमा पकाएको मिठो मसिनो खाने र एक आपसमा शुभकामना आदान प्रदान गरिरहेका छन् ।
‘विशेष नमाज पढेपछि आफूभन्दा ठूलाबडा कहाँ गई आशीर्वाद लिइएको छ । सानालाई आशीर्वाद दिइएको छ । यो आशीर्वाद लिने क्रम बिहीबारदेखि तीन दिनसम्म चल्छ । पाहुनालाई सेवइ र लछा (घ्यूमा भुटेर बनाइएको सेवइ) खुवाइन्छ,’ मुस्लिम अगुवा मुनिर खाँले भने ।
Discussion about this post