बाँके वैशाख २ गते ।
बाँकेका तत्कालिन प्रहरी प्रमुख एसपी सुभाषचन्द्र बोहराले तस्करसँग मिलेर मोटो रकम असुलीरहेको खवर बाहिर आएपछि अवधि नपुग्दै प्रहरी प्रधान कार्यालयले उनलाई सरुवा गरेपछि एसपी तुलबहादुर कार्की बाँकेको प्रहरी प्रमुखको रुपमा आएका छन् ।
नेपाल–भारत खुल्ला सीमानाका कारण यो जिल्लामा अवैध चोरी निकासी र अपराधका घटना हुँदै आएका छन् । तस्करसँग मिलेर मोटो रकम असुल्ने र भारी परिमाणको रकम लिएर जिल्लाबाट जाने गरेको पनि जिल्लामा आउने प्रहरी प्रमुखलाई आरोप लाग्ने गरेको छ ।
उनी आएपछि बाँकेमा हुँदै आएको चोरी निकासीसँगै अपराध नियन्त्रण हुने आशा गरिएको छ ।
बाँकेमा आउने प्रहरी प्रमुखको मुख्य चुनौती भनेको नै अवैध चोरी निकासी नियन्त्रण गर्नु रहने गर्दछ । यहाँ आउने प्रहरी प्रमुखले चोरी निकासी नियन्त्रण गर्न नसकेको आरोप लाग्दै आएकोले अहिलेका एसपी कार्कीको चुनौती पनि यहि रहेको छ ।
उनले तत्कालिन प्रहरी प्रमुखलाई लाग्दै आएको आरोप चिर्न सक्नुपर्ने चुनौति थपिएकै बेला उनले कसैको प्रभावमा नपर्ने र कसैलाई प्रभावमा नपार्ने प्रतिवद्धता जनाएका छन् ।
नयाँ वर्षको शुभकामना आदान प्रदान तथा बाँकेका पत्रकारसँग आइतवार गरिएको परिचयात्मक कार्यक्रममा उनले सवैको कुरा सुन्ने र सोही अनुसार काम गर्दै जाने आश्वासन समेत दिएका छन् । ‘म र मेरो टीमले कसैलाई प्रभावमा पार्ने छैन र प्रभावमा पर्ने छैन । यो मेरो प्रतिवद्धता हो,’ उनले भने, ‘नेपालको संविधानले दिएको अधिकारमाथि कुठाराघात हुने काम म र मेरो टीमले गर्ने छैन ।’
नेपालगन्जमा रहेका तस्करले मोटो रकम दिएर अवैध रुपमा सामान ओसार पसार गर्दै आएको जन गुनासो आउने गरेका छन् । भर्खरै आएका प्रहरी प्रमुख एसपी कार्कीले जनगुनासोलाई चिर्दै तस्करहरुको लोभमा नफस्ने हो भने मात्र बाँकेमा हुँदै आएको अवैध चोरी निकासी रोकिने छ भन्ने दुईमत छैन ।
बाँकेका वर्तमान प्रहरी प्रमुख एसपी कार्कीले पत्रकार माझ गरेको प्रतिवद्धता बोलीमा मात्र नभई ब्यवहारमा लागू गर्न सकेको खण्डमा मात्र यहाँका जनताले राहतको साँस फेर्न पाउने छन् । नाकामा बसेका सशस्त्र प्रहरीले तस्करसँग रकम लिएर अवैध सामान आउन दिँदै आएकोले यसतर्फ पनि बाँके प्रहरी प्रमुख एपसी कार्कीले ध्यान दिनुपर्ने देखिन्छ ।
नाकामा बसेका आफू मातहतका प्रहरी अधिकृत र जवानहरुमाथि पनि निगरानी बढाउनु पर्ने छ । बाँकेमा हुँदै आएको अवैध चोरी निकासी, अपराध नियन्त्रणको जिम्मा लिएर आएका एसपी कार्कीले यो रोक्न सक्छन् की सक्दैनन् समयले देखाउने छ ।
Discussion about this post