बाँके असार १ गते ।
चिनी आयात रोकिएपछि नेपालगञ्ज भन्सार कार्यालयले गत आर्थिक वर्ष २०८०।८१ मा लक्ष्य भन्दा न्यून राजस्व सङ्कलन गरेको छ । गत आवमा २८ अर्व ६६ करोड रुपियाँ राजस्व सङ्कलनको लक्ष्य रहेकोमा १८ अर्व १५ करोड रुपैयाँ मात्रै राजश्व सङ्कलन भएको भन्सार प्रमुख ध्रुवराज विश्वकर्माले जानकारी दिए ।
गत आवमा ६३.३४ प्रतिशत राजस्व सङ्कलन भएको छ । आर्थिक वर्ष २०७९।८० मा भन्सार लक्ष्य २९ अर्व ३२ करोड रुपियाँ रहेकोमा १८ अर्व १९ करोड ६९ लाख ७५ हजार रुपैयाँ राजस्व सङ्कलन भएको थियो । अघिल्लो आव भन्दा गत आवमा करिब चार करोड कम राजस्व सङ्कलन भएको छ ।
अघिल्लो आवमा चिनी आयातबाट मात्रै करिब ९० करोड रुपैयाँ सङ्कलन भएकोमा गत आवमा चिनीबाट शून्य राजस्व सङ्कलन भएको भन्सार प्रमुख विश्वकर्माले बताए, “चिनीसँगै डिजेल, चामल, जुत्ताचप्पलको आयात घट्ता समग्रमा राजस्व सङ्कलनमा कमी आएको छ ।“
नेपालगञ्ज भन्सार कार्यालयबाट इन्धन, चामल, खाद्यान्न, फलाम लगायतका वस्तुको आयातबाट बढी राजस्व सङ्कलन हुने गरेको भन्सार कार्यालयको तथ्याङ्कमा छ । नेपालगञ्ज नाकाबाट जडीबुटीलगायतका सामग्रीको निकासी हुने गरेको छ ।
Discussion about this post