बाँके साउन १ गते ।
नेपालगन्ज उपमहानगरपालिकाले फोहर ब्यवस्थापन गर्न नसकेको भन्दै नेपालगन्जका मुस्लिम अगुवाले भत्सर्ना गरेका छन् । फोहरले इस्लाम धर्मावलम्वीको महान पर्व मोहर्रमको अवसरमा भेला, नमाज बाचन र जुलुस निकाल्न समस्या भएको भन्दै मुस्लिम धर्म गुरु तथा अगुवाले रातको समयमा समेत फोहर संकलन गर्ने ब्यवस्था मिलाउन उपमहानगरसँग माग गरेका छन् ।
इस्लाम धर्मावलम्वी भेला हुने चोक, गल्ली, सडक र नमाज पढ्ने मस्जिद नजिक फोहरको थुप्रो लागे पनि उपमहानगरले उठाउन चासो नदिएको मोहर्रम पर्व तथा कर्बला व्यवस्थापन समितिका केन्द्रिय अध्यक्ष फिरोज हल्वाई वारसीले बताए । उनले मेयर र उपमेयर इस्लाम धर्मावलम्वीको महान पर्व मोहर्रमको महत्वलाई बुझ्न नसकेकै कारण फोहोर उठाउने ब्यवस्था नमिलाएको बताए । ‘मस्जिदमा नमाज पढ्न खाली खुट्टा जानु पर्छ । मस्जिद जस्तो पवित्र ठाउँमा फोहर खुट्टाले जान पर्दा नमजा लाग्छ । तर के गर्नु उपमहानगरले फोहर नउठाउँदा फोहर खुट्टा मस्जिद जान बाध्य छौँ,’ उनले भने ।
मोहर्रम पर्व तथा कर्बला व्यवस्थापन समिति धम्बोजीका अध्यक्ष मेराज अहमद हल्वाई (हिमालय) ले पनि मोहर्रमलाई उपमहानगरले हल्का रुपमा लिएको बताउँछन् । उनले मुस्लिम समुदायको उपमेयर भए पनि फोहर ब्यवस्थापनमा कन्जुस्याई गरेको बताए । ‘मोहर्रमको बेला धेरै फोहर निस्किन्छ । विहान, दिउँसो र रातको समयमा फोहोर उठाउने ब्यवस्था मिलाउनु पथ्र्यो, तर मुस्लिम समुदायको उपमेयरले समेत फोहोर उठाउनेतर्फ ध्यान दिएको पाएनौँ,’ उनले भने ।
मुस्लिम समाजका अगुवा समेत रहेका नेपाली कांग्रेस बाँकेका नेता, संविधान सभा सदस्य हाजी अब्दुल हमीद सिद्दिकी (भोला) ले १ तारिखदेखि १० तारिखसम्म नाङ्गै हिड्ने भएकोले सफाई आवश्यक रहेको बताए । उनले उपमहानगरले इस्लाम धर्मावलम्वीको महान पर्व मोहर्रमलाई बेवास्ता गरेको भन्दै आक्रोश ब्यक्त गरे ।
उनले उपमहानगरका मेयर र उपमेयर ब्यवस्थित बनाउन र फोहोर ब्यवस्थापन गर्न असफल भइसकेको बताए । ‘नमाज पढ्न मस्जिदा जाँदा घरबाट नाङ्गै खुट्टा गइन्छ । उपमहानगरको लापरवाहीका कारण मस्जिद जस्तो पवित्र स्थलमा फोहोर खुट्टाले जान परेको छ । यसले उपमहानगरको चरित्र उदांगो भएको छ,’ उनले भने ।
फोहोर ब्यवस्थापनमा वडा अध्यक्षहरुले पनि चासो नदिएको मुस्लिम अगुवाको भनाई छ । आ–आफ्नो वडामा दैनिक तीन पटक फोहोर उठाउने ब्यवस्था मिलाउन उनीहरुले माग गरेका छन् ।
Discussion about this post