बाँके भदौ ६ गते ।
नेपालगन्ज भन्सार कार्यालयले अवैध सामान नष्ट गरेको छ । नेपाल प्रहरी र सशस्त्र प्रहरीले बरामद गरि नेपालगन्ज भन्सार कार्यालयमा दाखिला गरेको करिव १० लाख रुपैयाँको पेय पदार्थ, सुर्तीजन्य र अन्य अखाद्य बस्तु नष्ट गरिएको प्रमुख भन्सार अधिकृत ध्रुवराज विश्वकर्माले जानकारी दिए । 
ति अवैध सामान आगो लगाएर नष्ट गरिएको बताउँदै उनले लिलाम गर्न नमिल्ने बस्तु विधि र प्रक्रिया पुर्याएर विहिवार नष्ट गरिएको बताए । ‘लिलाम गर्न नमिल्ने अवैध सामान कानुनको मापदण्ड पूरा गरि नष्ट गरिएको छ,’ उनले भने । 
उनले तीन सय ६५ थरिका अवैध सामान नष्ट गरिएको बताए । उनका अनुसार विहिवार नष्ट गरिएको बस्तु मध्ये सवैभन्दा धेरै पेय पदार्थ रहेको छ । सुर्तीजन्य पदार्थ र अन्य अखाद्य बस्तु जलाइए पनि पेय पदार्थका बोत्तलबाट झोल निकालेर बोत्तल विक्रिका लागि राखिएको उनको भनाई छ । ‘पेय पदार्थलाई खन्याएर कवाडीसँग बोत्तल विक्रि गर्छौँ,’ उनले भने । 
जथाभावी फाल्दा सर्वसाधारणले उठाएर लैजाने, बातावरण प्रदुषित हुने र गाड्दा पनि प्लाष्टिकजन्य बस्तु नकुहिने भएकोले आगोले नष्ट गरिएको उनको भनाई छ । ‘जलाउँदा बातावरणमा प्रभाव पर्छ भन्ने थाहा हुँदाहुँदै अर्को विकल्प भएन,’ उनले भने, ‘गाड्नुभन्दा जलाउनु नै उचित लाग्यो ।’ नष्ट गरेको सामान दुई ट्रक भएको भन्सार कार्यालयले जनाएको छ । नष्ट गर्न समितिले ढिलाई गरेका कारण सामान धेरै भएको प्रमुख भन्सार अधिकृत विश्वकर्माले बताए ।
Discussion about this post