बाँके भदौ ३१ गते ।
इस्लाम धर्मावलम्बिले मोहम्मद डे धुमधामका साथ मनाउँदै छन्। इस्लाम धर्मका प्रवर्तक हजरत मोहम्मद सल्लल्लाहु अलैहि वसल्लमले जन्म लिएको दिनको सम्झनामा इस्लाम धर्मावलाम्बिले आजको दिन हर्षोलासका साथ मानउँदै आएका छन्।
मोहम्मद डे को अवसरमा पुर्व मन्त्री समेत रहेका जनता समाजवादी पार्टी (जसपा) का महासचिव मोहम्मद इस्तियाक राई र जसपा नेपालका केन्द्रीय सचिव समेत रहेका नेपालगन्ज उपमहानगरपालिका कार्यबाहक मेयर कमरुद्धिन राइले एक आपसमा शुभकामना आदान प्रदान गरेका छन्।
बिपी चोकस्थित इदगाहामा दुई नेताले एक आपसमा गला मिलाएर शुभकामना दिए । पार्टी बिभाजन पछि फरक फरक पार्टीमा लागेपछि यी दुई नेताको भेटघाट पातलिएको थियो। मोहम्मद डे ले यी दुई नेताको भेट गर्ने मौका जुराइ दिएको छ।
भेटमा दुवै जनाले एक अर्काको सुख, शान्ति र समृद्धिको कामना समेत गरेका थिए। महासचिव इस्तियाक राईले देश–बिदेशमा रहेका इस्लाम धर्मवलम्बिलाई शुभकामना दिएका थिए। उनले देशको सुख, शान्ति र समृद्धिको कामना समेत गरे।
उनले विभिन्न धर्मावलम्बी, जातजाति र संस्कृतिमा आस्था राख्ने आम नेपालीहरूले सामाजिक सद्भाव कायम राख्न सदियौँदेखि प्रदर्शन गरेको एकतालाई कायम राख्न अपिल गरे । विभिन्न धर्म, सम्प्रदाय र जातिका नाममा पछिल्लो समय भइरहेका गलत गतिविधिलाई निरुत्साहित गर्ने दायित्व सबैको भएको बताउँदै उनले नेपालको संविधानले कायम गरेको धर्मनिरपेक्षताको मर्म र एकै स्थानमा मिलेर बसेको नेपाली समाजलाई कुनै पनि नाममा भड्काउने काम नगर्न अपिल गरे ।
मोहम्मद डे को अवसरमा नेपालगन्जका कार्यबाहाक मेयर कमरुद्धिन राईले पनि नेपालगंजबासीको सुख, शान्ति र समृद्धिको कामना गर्दै शुभकामना व्यक्त गरेका थिए। दुवैले एक आपसमा अंकमाल गर्दै मत फरक भएपनि मन एउटै भएको सन्देश दिए । बाँकेमा मोहम्मद डे शान्तिपूर्ण रुपमा मनाइयो । स्थानीय प्रशासनले पनि मोहम्मद डेलाई शान्तिपूर्ण र मर्यादित बनाउन प्रभावकारी भूमिका निर्वाह गरेको थियो ।
Discussion about this post