काठमाडौं असोज ७ गते ।
कांग्रेसमा मन्त्री छान्ने विषयमा विवाद हुँदा लुम्बिनीमा मन्त्रिपरिषद् विस्तारमा ढिलाइ भएको छ । कांग्रेसको भागमा रहेको दुई कोटामा मन्त्री छान्न ढिलाइ हुँदा त्यसको असर सरकार विस्तारमा पनि परेको हो ।
१२ सदस्यीय मन्त्रिमण्डल हुने लुम्बिनी सरकारमा एमालेले ५, कांग्रेसले ५ र बाँकी मन्त्रालय साना दलले पाउने सहमति भएको थियो । त्यही सहमतिअनुसार गत साउन ७ मा मुख्यमन्त्रीमा एमालेका चेतनारायण आचार्य नियुक्त भएका थिए । साउन ९ मा उनले एमालेबाट ४ र कांग्रेसबाट ४ मन्त्री नियुक्त गरेका थिए ।
तर, वन तथा वातावरणमन्त्रीमा नियुक्त बादशाह कुर्मीले राजीनामा दिएपछि सरकारमा अहिले कांग्रेसका ३ मन्त्री छन् । कुर्मीले राजीनामा दिएपछि लुम्बिनी सरकारमा कांग्रेसबाट महिला मन्त्री बनाउनुपर्ने दबाब महिला सांसदहरूले दिएका छन् । त्यसको नेतृत्व कांग्रेस प्रदेशसभा सदस्य एवं सचेतक निमा गिरीले गरेकी छन् ।
महिला मन्त्री बनाउनुपर्ने दबाब अभियानमा लागेपछि उनले भदौ ३१ मा कांग्रेस सचेतक पदबाट राजीनामा दिएकी छन् । लुम्बिनीमा कांग्रेसबाट ९ महिला सांसद छन् ।
Discussion about this post