बाँके चैत ११ गते ।
बाँकेको कोहलपुरमा विश्व वित्तीय सप्ताह –२०२५ भव्य रूपमा मनाइएको छ । लघुवित्त कर्मचारी मञ्च कोहलपुर बाँकेको आयोजनामा विश्व वित्तीय सप्ताह–२०२५ अन्तर्गत भव्य समारोहका बीच मनाइएको हो । नेपाल राष्ट्र बैंकका निर्देशक नारायण पोख्रेल पानसमा बत्ती बालेर कार्यक्रमको उदघाटन गरेका थिऐ ।
उनले कार्यक्रमलाई सम्बोधन गर्दै अरु संघ संस्था भन्दा लघुवित्त संस्थाबाट ऋण लिदा फाइदा हुने बताए । उनले भविष्यमा ऋणदाताहरुलाई कुनै पनि समस्या नहुने बताए । कार्यक्रमका प्रमुख अतिथि समेत रहेका पोख्रेलले आफ्नै क्षेत्रमा व्यवसाय गर्न चाहने, पैसा नभएका कारण पछि परेका युवाहरूलाई प्राथमिकतामा राखिएको बताए ।
उनले लघु वित्त सस्थाहरु नेपाल राष्ट्र बैंकको प्रत्येक्ष निगरानीमा रहने बताए । नेपालसहित १४६ देशमा वित्तीय सप्ताह मनाउने गरेको उनले जानकारी दिए । यसैगरी आर्थिकरूपमा पछि परेका महिलाहरुलाई संस्थामार्फत ऋण निकालेर पेशा व्यवसाय गरि आर्थिक लाभ लिन र आत्मनिर्भर बन्न उनले आग्रह गरे ।
नेपाल लघुवित्त बैकर्स संघका अध्यक्ष तथा नेशनल लघुवित्त वित्तीय संस्थाका प्रमुख कार्यकारी अधिकृत रामबहादुर यादवले संघले सेवाग्राहीहरूको उच्चतम् हितलाई ध्यानमा राखेर काम गरिरहेको बताए । उनले प्रत्येक वर्ष यसैगरी वित्तिए सप्ताह मनाउँदै आइरहेको बताए । उनले बिना धितो लगानी गर्ने र घर दैलोमा पुगेर सेवाग्राहीलाई सेवा दिने भनेकै लघु वित्त रहेको जानकारी दिए । सकारात्मक सोचका साथ लघुवित्तबाट कर्जा लिएर धेरैले आफू मात्र नभएर अरुलाई पनि रोजगार दिएको थुप्रै उदाहरणहरु रहेको उनले बताए ।
सप्ताहलाई हर्षोल्लासका साथ मनाउनुका साथै उत्साह जनक उपस्थिति रहेको भन्दै उनले खुसी व्यक्त गरे । दुर दराज र ग्रामीण ठाँउमा पनि बिना धितो कर्जा प्रदान गरेर केही गर्नका लागि महिलाहरुको सहारा बनेको उनले दाबी गरे । कार्यक्रममा लघुवित्तबाट ऋण लिएर व्यवसाय गरि आत्मनिर्भर भएका व्यक्तिहरुले आफ्ना अनुभव सुनाएका थिए ।
कार्यक्रमको अवसर पारेर विभिन्न १७ वटा संस्थाहरूलाई कदर पत्रसहित सम्मान गरिएको थियो । लघुवित्त बैंकर्स संघको सहकार्यमा सञ्चालन भएको सप्ताह मार्च १७ तारिखका दिन सुरू भएको थियो । सप्ताह मार्च २३ तारिख अर्थात आइतवार चैत १० गते सकिएको छ ।
Discussion about this post