बाँके वैशाख ३ गते ।
सवारी दुर्घटनामा परि चालू आर्थिक वर्षको ९ महिनामा बाँकेमा ५७ जनाले ज्यान गुमाएका छन् । सवारी दुर्घटनामा ९० जना सख्त घाइते र ४४७ जना सामान्य घाइते भएको जिल्ला ट्राफिक प्रहरी कार्यालय बाँकेका प्रमुख प्रहरी निरीक्षक पुष्करराज पन्तले जानकारी दिए ।
उनले तीव्र गति, मादक पदार्थ सेवन गरि सवारी साधन चलाउने र ट्राफिक नियम उलंघन गरेका कारण सवारी दुर्घटना भएको अनुसन्धानबाट खुलेको बताए । दुर्घटनामा परि पुस महिनामा सवैभन्दा धेरैको मृत्यु भएको उनले बताए । उनका अनुसार पुस महिनामा सवारी दुर्घटनामा परि ९ जनाको मृत्यु भएको छ ।
त्यसैगरी, असोज र कात्तिकमा ८/८ जना र माघमा सात जना, साउन, भदौँ र चैत महिनामा ६/६ जनाको मृत्यु भएको उनले बताए । उनले मंसिरमा ३ जना र फागुनमा चार जनाले ज्यान गुमाएको बताए । ‘दुर्घटनामा ४६ पुरुष, ७ महिला, ३ बालक र एक बालिकाको मृत्यु भएको छ,’ उनले भने ।
घाइते हुनेको संख्या पनि महिलाको भन्दा पुरुषको धेरै भएको जिल्ला ट्राफिक प्रहरी कार्यालयको तथ्यांकले देखाएको छ । गत ९ महिनामा ५१ जना पुरुष, ११ जना महिला, ७ बालक र ३ वालिका गरि ९० जना सख्त घाइते भएको पन्तले जानकारी दिए । ‘दुर्घटनामा २८२ जना पुरुष, ९७ जना महिला, ३९ जना बालक र २९ जना बालिका गरि ४४७ जना सामान्य घाइते भएको तथ्यांक छ,’ उनले भने ।
ट्राफिक नियम उलंघन तथा दुर्घटना न्यूनिकरण गर्न पछिल्लो समय तदारुकता देखाएको बाँके ट्राफिक प्रहरीले सार्वजनिक गरेको तथ्यांकले देखाएको छ । यसबाट राजस्वमा समेत बृद्धि भएको छ । ६ साउन, २०८१ देखि चैत मसान्तसम्म बाँके ट्राफिकले २६ हजार ७२४ वटा सवारी साधनलाई कारवाही गरि दुई करोड १८ लाख ९७ हजार ५ सय रुपैयाँ राजस्व संकलन गरेको छ ।
फागुन महिनामा २९ लाख ११ हजार ५ सय रुपैयाँ राजस्व संकलन गरेको ट्राफिक प्रहरीले चैत महिनामा २५ लाख ८९ हजार ५ सय रुपैयाँ राजस्व संकलन गरेको छ । मादक पदार्थ सेवन गरि सवारी साधन चलाउने एक हजार ५३ जनालाई कारवाही गरिएको पन्तले जानकारी दिए । मापसे गर्नेहरुलाई गरिएको कारवाहीबाट ५३ लाख ४५ हजार रुपैयाँ राजस्व संकलन भएको उनले बताए ।
तीव्र गतिमा सवारी साधन चलाउन १ हजार ४६१ जनालाई कारवाही गरि उनीहरुबाट सात लाख २० हजार ५ सय र ओभर लोड बोक्ने ३ हजार ८०८ वटा सवारी साधनलाई कारवाही गरि ३७ लाख ९७ हजार रुपैयाँ राजस्व संकलन भएको उनले जानकारी दिए ।
९ महिनाको अवधिमा १ हजार ७०९ वटा सचेतनामुलक कार्यक्रम संचालन गरि एक लाख १६ हजार ९७० जनालाई ट्राफिक नियम सम्बन्धि जानकारी गराइएको उनको भनाई छ ।
Discussion about this post