बाँके बैशाख १८ गते ।
बाँकेका प्रहरी प्रमुख प्रहरी उपरीक्षक (एसपी) तुलबहादुर कार्की सरुवा भएर केहि दिनमा यहाँबाट विदाई हुँदैछन् । बाँकेमा करिव १४ महिना बसेका एसपी कार्कीले बाँकेबासीको मन जितेर विदाई हुँदैछन् । खरो स्वभावका उनी ब्यवहारमा सरल र जिम्मेवारी बहनमा पक्का भएको उनको ब्यवहारले देखाएको छ ।
बाँके जिल्लामा ७७ जिल्ला सँगै भारतीय नागरिकको समेत बसोबास छ । हिन्दू, मुस्लिम, शिख, इसाई, बुद्धिष्ट लगायत धर्ममा आस्था राख्नेहरु बस्ने जिल्ला पनि हो बाँके । त्यसैले यो जिल्ला धार्मिक रुपमा समेत विविधता भएको जिल्ला हो । विभिन्न धर्ममा आस्था राख्नेहरु बसोबास गर्ने भएकोले यो जिल्लामा बेलाबखत एक अर्को धर्मावलम्वी वीच द्वन्द्व हुने गर्दछ । धार्मिक द्वन्द्वलाई ब्यवस्थापन गर्न नसकेकै कारण कारण सिडिओ र प्रहरी प्रमुखको अवधि नपुग्दै सरुवा हुने गरेको इतिहास पनि छ, भने विवाद र राम्रो काम गर्न नसकेकै कारण पनि अवधि नपुग्दै झोला झम्टी बोकेर जानु परेको घटना पनि छ यहाँ ।
खासगरि सिडिओ र प्रहरी प्रमुख एसपीलाई १२ महिनाका लागि जिल्लामा पठाइन्छ । तर, एसपी कार्की झण्डै १४ महिनापछि बाँकेबाट विदाई हुँदैछन् । उनले बाँकेमा धार्मिक तथा सामाजिक सद्भाव कायम गर्न महत्वूर्ण भूमिका निर्वाह गरे नै भारतबाट हुने अवैध तस्करी, साना हतियार नियन्त्रण र लागु औषध नियन्त्रणमा सफल भएका छन् । हत्या, हिंसामा संलग्नलाई पक्राउ गरि कानुनी दायरामा ल्याउन सफल भएका उनी मानव बेचविखान नियन्त्रणमा समेत सक्रिय भए ।
उनी बाँकेमा आउँदा विषम परिस्थिति थियो । हिन्दू र इस्लाम धर्मावलम्वी वीच तनाव भएकै बेला उनी यहाँ आएका हुन् । तत्कालिन एसपीले तनाव ब्यवस्थापनमा महत्वपूर्ण भूमिका निर्वाह गर्न नसकेपछि एसपी कार्कीलाई बाँकेमा पठाइएको थियो । उनी रातदिन नभनी शान्ति, सुरक्षामा खटिएकै कारण बाँकेबासीले शान्ति र सुरक्षित भएको महशुस गर्न पाएका छन् । ‘कार्की एसपी साव आएदेखि बाँकेमा शान्ति छ । हामीले पनि आफूलाई सुरक्षित भएको महशुस गर्न पाएका छौँ,’ नेपालगन्ज उपमहानगरपालिका ४ का मेराज हल्वाई (हिमालय)ले भने, ‘नगरबासीले आफूलाई सुरक्षित भएको महशुस गर्न पाउनु नै सवैभन्दा ठूलो कुरा हो ।’
एसपी कार्की दिनरात नभनी शान्ति, सुरक्षाका लागि फिल्डमा खटिए । आफू मातहतका प्रहरी कर्मचारीले गरेको कामलाई नजिकबाट नियाल्ने र निर्देशन दिए । राम्रो काम गर्ने प्रहरी कर्मचारीलाई पुरस्कार र नराम्रो काम गर्नेलाई कारवाही समेत गरे । जसको फलस्वरुप बाँकेमा शान्ति कायम भएको छ नै यहाँका नागरिक समेत सुरक्षित भएका छन् । ‘बाँकेमा कति बेला के हुन्छ भन्ने निश्चित हुँदैन । एसपी कार्की आएदेखि ढुक्कसँग काम गर्ने र हिड्डुल गर्ने वातावरण बनेको छ,’ नेपालगन्ज २३ का अब्दुल हमिद खानले भने ।
बाँकेमा प्रहरी प्रमुखको रुपमा एसपी रामप्रसाद घर्तीको सरुवा भएको छ । एसपी घर्ती आउने वित्तिकै एसपी कार्की यहाँबाट विदाई भएर जाने छन् । राम्रो काम गरेर जाँदै गरेका एसपी कार्कीलाई बाँकेबासीले सम्झिरहने नेपालगन्ज उपमहानगरपालिका २० का सन्तोष यादवले बताए । ‘यहाँ आउने एसपीले जनतालाई दिने केहि होइन, हामीलाई शान्ति र सुरक्षित भएको महशुस गराए पुग्छ ।
अहिलेको एसपी कार्कीले पनि त्यहि गर्नु भयो । त्यसैले त उहाँलाई बाँकेबासीले सम्झेका छन्,’ उनले भने, ‘अव आउने एसपी सावले पनि कार्कीले जस्तै काम गरेर हामीलाई शान्ति र सुरक्षित भएको महशुस गराउनु हुने छ ।’
Discussion about this post