बाँके जेठ ११ गते ।
कुनै बेला नेपालगन्ज उपमहानगरपालिका ८ स्थित धोवी तलाउ हेर्न लायक थियो । तलाउमा बाह्रै महिना पानी भइरहने भएकोले पानीमा बस्ने चराहरुको बासस्थान पनि थियो धोवी तलाउ । तलाउमा कमलको फुल र वरिपरि बेगनबेली फुल फुल्दा यो तलाउ झनै सुन्दर देखिन्थ्यो ।
जाडो सिजनमा सिंगाडा फल्ने यो तलाउले नेपालगन्जको सुन्दरतामा थप जलप लगाएको थियो । यो तालमा धोवीले लुगा धुने भएकोले पनि धोवी तलाउ नाम राखिएको हो । चराचुरुंगीको चिरविर आवाज, कमल र बेगनबेली फुलको सुन्दरतासँगै धोवीले लुगा धुँदा यसको सुन्दरता अझै थपिएको थियो ।
तर, पछिल्लो समय यो तलाउ कुरुप बन्दै गएको छ । तलाउको संरक्षण गर्ने जिम्मेवारी पाएको नेपालगन्ज उपमहानगरपालिकाले संरक्षणको साटो फोहोर फालेर थप कुरुप बनाउँदै छ । उपमहानगरले तलाउ पुर्न नेपालगन्जबाट निस्केको फोहोर यहि तलाउमा फाल्दै आएको छ ।
नेपालगन्जबाट निस्केका फोहोरलाई ब्यवस्थित रुपमा भण्डारण गर्न नेपालगन्ज उपमहानगरपालिका २३ मा ३८ करोड रुपैयाँ लागतमा ल्याण्डफिल साइट निर्माण भए पनि उपमहानगरले नेपालगन्जको बिच भागमा पर्ने धोवी तालमा फोहोर फाल्न थालेको छ । फोहोरले आसपासका क्षेत्र दुर्गन्धित भएपछि स्थानीयले विरोध जनाएका छन् ।
फोहोरले घर भित्र समेत बस्न नसकिने अवस्था भएको स्थानीय उषा कुमारी खडकाले बताइन् । उनले भनिन्, ‘पटक पटक विरोध गर्दासमेत उपमहानगर र प्रमुख जिल्ला अधिकारी (सिडिओ) सावले सुनेर पनि नसुने झैँ गर्नु भएको छ ।’ उपमहानगरले धोवी तलाउमा फोहोर फाल्न थालेपछि यसको चर्को विरोध भएको छ ।
नागरिक समाज बाँकेका संयोजक कृष्णप्रसाद श्रेष्ठले धोवी तलाउको संरक्षण गर्नुपर्ने बताउँछन् । उनले कुनै पनि हालतमा उक्त तलाउमा फोहोर फाल्न नहुने बताएका छन् । ‘तलाउको संरक्षण गरि यसको सौन्दर्यकरण गर्न स्थानीय सरकारले पहल गर्नुपर्छ,’ उनले भने, ‘तलाउमा फोहोर फाल्ने कार्य सरासर गलत छ । यो तत्काल रोकिनु पर्छ ।’
तर, नेपालगन्ज उपमहानगरका मेयर, उपमेयर र ८ नं. का वडा अध्यक्ष आ–आफ्नो दायित्वबाट पन्छिदै आएका छन् । एकले अर्को माथि आरोप थोपरेर उम्किने प्रयास मेयर, उपमेयर र वडा अध्यक्षले गर्दै आएका छन् । मेयर प्रशान्त विष्टले फोहोर फालेको बारे आफूलाई जानकारी नभएको भन्दै वडा कार्यालयसँग समन्वय गरि रोक्ने बताए । उनले फोहोर ब्यवस्थापन र भएका संरचनाको संरक्षण गर्ने दायित्व वडा कार्यालयको भएको बताए । ‘फोहोर फाल्ने डम्पिङ साइट हुँदाहुँदै धोवी तलाउमा फाल्ने कार्य उचित होइन,’ उनले भने, ‘फोहोर फालेको हो भने म रोक्न लगाउँछु ।’
उपमेयर कमरुद्धिन राईले पनि आफूलाई जानकारी नभएको बताउँदै यस बारेमा मेयरसँग जानकारी लिनुपर्ने बताए । उनले तलाउमा फोहोर फाल्न नहुने जिकिर गरे । ‘यस विषयमा मलाई जानकारी भएन, मेयर सावसँग कुरा गर्नुस,’ उनले भने ।
८ नं. का वडा अध्यक्ष रजनीश बाजपेयीले वडा कार्यालयले नभई उपमहानगरले फोहोर फालिरहेको दावी गरे । उनले भने, ‘धोवी तलाउमा उपमहानगरले फोहोर फालेको हो । यसमा वडा कार्यालयलाई कुनै जानकारी छैन । एक पटक उपमहानगरका कर्मचारी, मेयर र उपमेयरसँग कुरा गर्नुस,’ उनले भने ।
नेपालगन्ज उपमहानगरपालिका सरसफाई शाखाका एक कर्मचारीले फोहोर नभई माटो फाल्दै आएको बताए । उनले वडा कार्यालय भवन निर्माणका लागि नेपालगन्जका नाला सफाई गर्दा निस्केको फोहोर मात्र फालेको बताए । ‘फोहोर होइन, नाला सफाई गरेर निस्केको माटोमात्र फालेको हो,’ ति कर्मचारीले भने ।
उपमहानगरका जनप्रतिनिधिहरु एक अर्कालाई पन्छिएर फोहोर फाल्ने दाउमा छन् । यसले नेपालगन्जको सुन्दरतामा असर त पर्ने नै भयो नेपालगन्जको तापक्रम थप बढाउने भएको छ ।
यो समाचार पनि पढ्नुहोस्
शहरलाई कुरुप बनाउँदै उपमहानगर : ल्याण्डफिल साइटमा फाल्ने फोहोर धोवी तालमा फालेर दुर्गन्ध फैलाउँदै
Discussion about this post