बाँके भदौ ३० गते ।
यतिबेला भारतबाट फर्किने नेपालीको नेपालगन्ज नाकामा घुइँचो लाग्छ । ओढ्ने, ओछ्याउने र खाना पकाउने भाँडाकुँडासहित स्वदेश फर्किने नेपालीले नेपालगन्जमा सास्ती खेप्न परेको छ । जेन जीको आन्दोलनका कारण बन्द भएको नाका आंशिक रुपमा खुले पनि सशस्त्र प्रहरीले कडाई गर्दा स्वदेश फर्किने नेपालीलाई सास्ती खेप्न परेको हो ।
नाकामा भीडसँगै सुरक्षाकर्मीले कडाई गर्दा लामो लाइनमा बस्नुपर्ने र केरकार गरेको जाजरकोटका दिनेश चलाउनेले बताए । उनले नाकामा खटिएका सुरक्षाकर्मीले भारतीय पाइडिल रिक्सालाई आउन नदिँदा भारी बोक्न परेको बताए । उनले भने, ‘एक त लाइन लामो हुन्छ, त्यसैमा भारी बोक्न पर्दा झनै सास्ती खेप्न परेको छ ।’
भारतको मुम्बईबाट फर्किदै गरेका सुर्खेतका किरण विकले पनि नेपालगन्ज नाकामा सास्ती खेप्न परेको गुनासो गरे । उनले काम गरेर भारतबाट फर्किने नेपालीका लागि छुट्टै लाइनको ब्यवस्था गर्नुपर्ने सुझाव दिए । ‘पाइडिल रिक्सालाई दशगजाभन्दा यता आउन नदिँदा भारी बोकेर आउन परेको छ । नाकामा खटिएका सुरक्षाकर्मीले काम गरेर फर्किने नेपालीका लागि छुट्टै ब्यवस्था गर्नुपर्छ,’ उनले भने, ‘आफ्नो देशमा छिर्न पनि गाह्रो छ ।’
नेपाल तर्फका सुरक्षाकर्मीले भारतीयलाई प्रवेशमा कडाई गरेका छन् । नेपाली नागरिकलाई मात्र प्रवेश गर्न दिएका सुरक्षाकर्मीले भारतीयलाई नाकाबाट फर्काउने गरेका छन् । तर, भारतीय सशस्त्र सिमा सुरक्षा बल (एसएसबी) ले नेपालीलाई सहज रुपमा आउजाउ गर्न दिएको छ । ‘भारत आउजाउ गर्न सहज छ, तर नेपालतर्फ आउने भारतीयलाई प्रवेशमा कडाई गरिएको छ,’ किनमेल गरेर फर्किदै गरेका नेपालगन्ज उपमहानगरपालिका १२ बेलासपुरका रामसागर हरिजनले भने ।
भारतबाट फर्किने नेपालीलाई लिन नेपालगन्जका होटल ब्यवसायी र ई–रिक्साहरु नाकामा पुग्ने गरेका छन् । ई–रिक्सा र होटल ब्यवसायीका कारण पनि भारतबाट फर्किने नेपालीले सास्ती ब्यहोर्न परेको छ । ई–रिक्साहरुले नेपालीको सामान खोसाखोस गर्ने र जवरजस्ती सामान आफ्नो रिक्सामा राख्दा झनै सास्ती ब्यहोर्नु परेको सल्यानका विजयी थापाले गुनासो गरे ।
भिडियो पनि हेर्नुहोस्
Discussion about this post