बाँके असोज ५ गते ।
नेपालगन्जमा चोरले आतंक मच्चाएका छन् । चोरहरुले टोलमा चोरीमात्र गर्र्दैनन्, सर्वसाधारणलाई आतंकित बनाउन पर्चा समेत टाँसेर जान्छन् । अहिले सिंगो नेपालगन्ज आतंकित छ । प्रहरीले कुनै चासो नदिएपछि आफ्नो टोल जोगाउन सर्वसाधारण रातभर जाग्राम बस्छन्, रातभर पहरा दिन्छन् । चोरको आतंकबाट नेपालगन्ज उपमहानगरपालिकाको त्रिभुवन चोक, एकलैनी, सदरलाइन, रानीतलाउ क्षेत्र पनि अछुतो छैन ।
यी क्षेत्रका बासिन्दा रातभर सुत्न सक्दैनन् । चोरको विगविगी बढेपछि आफू र आफ्नो टोलबासीको धनसम्पत्ति जोगाउन रातभर पहरा दिन्छन् । यी ठाउँका सर्वसाधारणको धन र जनको सुरक्षा गर्न नगर भवनमा प्रहरी युनिट राखिएको छ । उक्त प्रहरी युनिटमा आधा दर्जन प्रहरी कार्यरत छन् । सर्वसाधारण रातभर सुत्न नसक्दा यो युनिटका प्रहरी भने रातभर मजाले सुत्छन् । दिउँसोको समयमा त्रिभुवन चोक, एकलैनी, सदरलाइन, रानीतलाउ क्षेत्रमा ड्यूटी गर्ने त्यस युनिटका प्रहरी बेलुकी ८ बजेपछि बाहिर निस्कदैनन् । ‘सर्वसाधारण रातभर नसकेको बेला दिउँसोको समयमा देखिने प्रहरी रातको समयमा कार्यालयबाट बाहिर निस्कदैनन्,’ नेपालगन्ज उपमहानगरपालिका—३ का वडा अध्यक्ष मोहम्मद अय्यूब सिद्धिकीले भने, ‘सर्वसाधारणलाई आवश्यकता पर्नेबेला प्रहरीले अनुहार देखाउँदैन । दिउँसो ड्यूटी गर्ने प्रहरी रातको समयमा कता लुक्छन् पत्तो हुँदैन ।’
सर्वसाधारणलाई आपत परेको बेला नगर भवन प्रहरी युनिटका इन्चार्ज असई सुनिल शाही टिकटक र फेसबुकमा भिडियो अपलोड गर्नमा ब्यस्त भएको उनको प्रोफाइलबाट प्रष्ट हुन्छ । उनले टिकटक र फेसबुकमा दैनिक तीन–चार वटा भिडियो अपलोड गर्दै आएका छन् ।
उनी फेसबुक र टिकटकमा ब्यस्त मात्र हुँदैनन्, सर्वसाधारणसँग प्रस्तुत हुने शैली पनि उनको भिन्दै छ । राजसी शैलीमा ड्यूटीमा खटिने उनी दिउँसोको समयमा सिंह जस्तै गर्जिन्छन् । ‘दिउँसोको समयमा सिंह जस्तै गर्जिने असई शाही रात पर्ने वित्तिकै दुलोमा लुक्छन् । टोलका सर्वसाधारणलाई के समस्या छ भन्ने समेत बुझ्दैनन्,’ नेपालगन्ज उपमहानगरपालिका—३ का राकेश कनौजियाले भने, ‘रातको समयमा प्रहरीले गस्ती नगर्दा चोरको विगविगी बढेको छ । हामी रातभर सुत्न नपाउँदा प्रहरी भने मजाले सुत्नु दुखद हो ।’
Discussion about this post