बाँके असोज ७ गते ।
बाँकेका प्रहरी प्रमुखमा सरुवा भई आएका एसपी अंगुर जिसीले आज पदभार ग्रहण गरेका छन् । नेपाल प्रहरी प्रधान कार्यालय नक्साल, काठमाण्डौँको निर्णयअनुसार उनी बाँके सरुवा भएका थिए । अपराध अनुसन्धानमा कार्यरत हुँदै आएका उनले जिल्ला प्रहरी कार्यालयमा पदभार ग्रहण गर्दै औपचारिक रूपमा जिम्मेवारी सम्हालेका हुन् ।
पदभार ग्रहण समारोहअघि जिल्ला प्रहरी कार्यालयमा कार्यरत प्रहरी कर्मचारीले उनलाई स्वागत गरेका थिए । सो क्रममा एसपी जिसीले मुलुकको विषम परिस्थितिमा प्रहरीमाथि आक्रमणसम्म हुने अवस्था सिर्जना भएको उल्लेख गर्दै यस्ता चुनौतीपूर्ण घडीमा झन् उच्च मनोबलका साथ नागरिक सेवामा जुट्नुपर्नेमा जोड दिए ।
अपराध अनुसन्धानमा दक्ष अधिकृतको रूपमा परिचित एसपी जिसीले शून्य सहनशीलताको नीति अपनाएर इमानदारीपूर्वक काम गर्न अधिनस्थ प्रहरी कर्मचारीलाई निर्देशन दिएका छन् । साथै, तोडफोड र अराजक गतिविधि बढिरहेको सन्दर्भमा प्रहरीलाई जिम्मेवारीपूर्वक र दृढताका साथ आफ्नो कर्तव्य निर्वाह गर्नुपर्नेमा उनले विशेष बल दिए ।
कसैसँग पक्षपात नगरी निष्पक्ष र पारदर्शी ढंगले कर्तव्य निर्वाह गर्नुपर्नेमा उनको जोड थियो । उनले प्रहरी संगठनमा अनुशासन, जवाफदेहिता र इमानदारीलाई प्राथमिकतामा राख्ने बताए । “नागरिकलाई सहयोग गर्ने, पीडितलाई न्याय दिलाउने र अपराधीलाई कानूनी दायरामा ल्याउने हाम्रो पहिलो दायित्व हो,” उनले भने, “यसका लागि सबै प्रहरी अधिकृत र जवानहरू सक्रिय, संवेदनशील र उत्तरदायी बन्नुपर्छ ।”
Discussion about this post