बाँके मंसिर १९ गते ।
नेपालगञ्ज उप–महानगरपालिकाले शहरमा बृद्धि हुँदै गएको अटो–रिक्सा अव्यवस्थित सञ्चालन नियन्त्रणका लागि कडाइ गर्ने निर्णय गरेको छ । शहरको सौन्दर्यता, ट्राफिक व्यवस्थापन र सवारी सुरक्षा जटिल बन्दै गएको आकलन गर्दै उप–महानगरपालिकाले सात दिनभित्र निर्देशन पालन गर्न सबै स सम्बद्धलाई आग्रह गरेको हो ।
नेपालगञ्ज देशकै पुराना र ऐतिहासिक शहरमध्ये एक मात्र नभई पश्चिम नेपालको मुख्य व्यापारिक, शैक्षिक तथा स्वास्थ्य केन्द्र भएकाले यहाँ दैनिक रूपमा मानिस तथा सवारी साधनहरूको ठूलो चाप रहन्छ । पछिल्ला वर्षहरूमा तिनपाङ्ग्रे अटो–रिक्साको संख्या अत्यधिक बढेपछि व्यवस्थापन चुनौतीपूर्ण बनेको उप–महानगरपालिकाले जनाएको छ ।
जथाभावी सञ्चालन, अनियमित रुपान्तरण तथा अनधिकृत प्रवेशका कारण सवारी दुर्घटना बढ्दै गएको र सहरको समग्र जनजीवन प्रभावित भएको अभिव्यक्ति पनि स्थानीय प्रशासनले दिएको छ । यही अवस्थालाई व्यवस्थित बनाउन नगरप्रमुख प्रशान्त विष्टको अध्यक्षता, प्रमुख जिल्ला अधिकारी दिलकुमार तामाङको उपस्थिती तथा सम्बन्धित सरकारी निकायका पदाधिकारीहरूको सहभागितामा मंसिर १४ मा बसेको बैठकले अटो–रिक्सा व्यवस्थापनका सम्बन्धमा निर्देशिका जारी गरेको नेपालगन्ज उपमहानगरका प्रमुख प्रशासकीय अधिकृत रामहरि शर्माले जानकारी दिए ।
निजी प्रयोजनका लागि दर्ता भएका रातो नम्बर प्लेटका अटो–रिक्साले व्यावसायिक रूपमा सञ्चालन गरेको पाइएकाले अबदेखि निजी प्रयोजनमै सीमित हुनेछ । विपरीत कार्यमा कानुनी कारबाही हुने चेतावनी दिइएको छ ।त्यसैगरी वेल्डिङ, मर्मत वा संरचना परिवर्तन गरी अवैधरूपमा चलाइएका तथा दर्ता–नविकरण, सूचिकरण वा बिलरविजक नभएका अटो–रिक्सा तुरुन्त रोक लगाउने निर्णय भएको छ ।
खरिद–विक्री भई बिल–विजक भए पनि दर्ता–नविकरण वा सूचिकरण नगरिएका अटो–रिक्साले तुरुन्त सम्बन्धित निकायमा प्रक्रिया पूरा गर्नुपर्नेछ । अन्यथा सञ्चालनमा रोक लाग्ने निर्णय भएको पनि उनले बताए । अन्य स्थानीय तहमा दर्ता वा इजाजत लिइएका अटो–रिक्सालाई नेपालगञ्ज उप–महानगरपालिकाको क्षेत्रमा प्रवेश बन्द गरिने भएको छ ।
बिरामी बोकेका वा आकस्मिक काम बाहेक कुनै पनि अवस्थामा प्रवेश गर्न नपाइने उप–महानगरपालिकाले जनाएको छ ।नेपालगञ्जमा चल्ने सबै दर्ता–नविकृत अटो–रिक्साले उप–महानगरपालिकामा अनिवार्य सूचिकरण गर्नुपर्नेछ । सूचिकरण नगरी चलाइएमा कारबाही हुनेछ ।यस्तै चालक अनुमति पत्र र परिचयपत्र अनिवार्य व्यवस्था गरिएको पनि उनले बताए ।
Discussion about this post