बाँके पुस १३ गते ।
जनता समाजवादी पार्टी नेपाल (जसपा) ले आगामी निर्वाचनका लागि बाँके क्षेत्र नम्बर २ बाट समानुपातिक मुस्लिम कोटातर्फ अब्दुल अजीज हल्वाईलाई पहिलो नम्बरमा सिफारिस गरेको छ।
फागुन २१ गते हुने निर्वाचनलाई लक्षित गर्दै शनिबार पार्टीले हल्वाईको नाम सिफारिस गर्ने निर्णय गरेको हो। जसपा जिल्ला अध्यक्ष कौशल कुमार धोबीको हस्ताक्षरमा केन्द्रमा पठाइएको सिफारिस पत्रमा हल्वाईलाई मुस्लिम अल्पसंख्यक समुदायको प्रतिनिधित्वका आधारमा अगाडि बढाइएको उल्लेख छ।
पार्टीका अनुसार संगठन निर्माण र विस्तारमा सक्रिय भूमिका निर्वाह गरेकाले हल्वाईलाई समानुपातिकतर्फ सिफारिस गरिएको हो। बाँके जिल्लामा अब्दुल अजीज हल्वाई एक समाजसेवी पात्रका रूपमा परिचित हुनुहुन्छ। अन्यायका विरुद्ध आवाज उठाउने, समाजका मुद्दामा निरन्तर सक्रिय रहने युवा नेतृत्वका रूपमा उहाँको पहिचान स्थापित हुँदै गएको पार्टी नेताहरूको भनाइ छ।
कानुनका विद्यार्थी तथा भावी अधिवक्ता रहनुभएका हल्वाई पत्रकारितामार्फत पनि समाजसँग जोडिँदै आउनुभएको छ। उहाँ विभिन्न गैरनाफामूलक संस्था, एनजिओ तथा सामाजिक संघ–संस्थामार्फत शिक्षा, सामाजिक सचेतना, न्याय र समानताको पक्षमा सक्रिय रहँदै उल्लेखनीय योगदान पु¥याउँदै आउनुभएको छ।
राजनीति उहाँका लागि पद वा प्रतिष्ठाभन्दा पनि सेवाको अर्को माध्यम भएको र जनताको दुःख–सुखमा सँगै उभिने अठोटका साथ समानुपातिक उम्मेदवारका रूपमा अघि बढ्नुभएको पार्टीले जनाएको छ।
जसपाका नेताहरूका अनुसार हल्वाईको सिफारिस व्यक्तिगत उपलब्धि मात्र नभई आवाजविहीन युवा, अल्पसंख्यक समुदाय तथा न्याय खोजिरहेका आम नागरिकहरूको साझा आशाको प्रतिनिधित्व हो। पार्टीले आगामी दिनमा पनि समावेशी प्रतिनिधित्व र जनताको अधिकारका पक्षमा संघर्ष जारी राख्ने जनाएको छ।
Discussion about this post