बाँके पुस ११ गते ।
लुम्विनी प्रदेशका सामाजिक विकास मन्त्री जन्मजय तिमिल्सेनाले बाँके खेलकुदको उर्वरभूमि भएको बताएका छन् । ८औँ राष्ट्रपति रनिङ शिल्ड खेलकुद तथा मेयर कप खेलकुद प्रतियोगिताको आज नेपालगन्जमा उद्घाटन गर्दै उनले यस्ता प्रतियोगिताले नयाँ प्रतिभाहरुको उजागर हुने बताए ।
उनले खेलकुदलाई प्रविधिसँग जोड्न सकियो भने त्यसले यसक्षेत्रको पहिचान स्थापित गर्ने धारणा समेत व्यक्त गरेका छन् । सामाजिक विकास मन्त्रालयले खेलकुद र शिक्षालाई पहिलो प्राथमिकता दिएर काम गर्दै आएको पनि बताए । प्रतियोगिताबाट उत्कृष्ट हुने खेलाडीहरुले प्रदेशकै प्रतिनिधित्व गर्ने भएकाले निष्पक्ष भएर खेलाडी छनौट गर्न पनि उनले निर्देशन दिए ।
यस्तै नेपालगन्जका नगर प्रमुख प्रशान्त विष्टले खेलकुद नेपालगन्जको पहिचान भएको बताए । उनले नेपालगन्जका थुप्रै खेलाडीहरुले राष्ट्रिय तथा अन्तराराष्ट्रिय स्तरमा प्रदर्शन गरेर नेपालगन्जको पहिचान दिलाएको उल्लेख गरे । खेलकुदका गतिविधिहरुलाई चलायमान गराउन विद्यालयले पनि खेलकुदलाई प्राथमिकता दिनुपर्ने उनको भनाइ छ । यस्तै बाँकेका प्रमुख जिल्ला अधिकारी दिलबहादुर तामाङले खेलकुदले युवाहरुलाई अनुशासित बनाउने बताए ।
नेपालगन्ज उपमहानगरपालिकाको आयोजना तथा प्याब्सन नेपालगन्जको व्यवस्थापनमा प्रतियोगिता संचालन भएको हो । १४ गतेसम्म चल्ने प्रतियोगितामा उपमहानगरका माध्यमिक तहमा ५० र आधारभूत तहमा ५१ वटा विद्यालयका छात्र छात्राहरूले प्रतिस्पर्धा गर्ने प्याब्स नगर सचिव विज्ञान शाहले बताए । नेपालगन्ज रंगशालामा सुरु भएको प्रतियोगिता उद्घाटन अघि नेपालगन्जमा वृह्त प्रभातफेरी गरिएको थियो ।
Discussion about this post