बाँके पुस २५ गते ।
राष्ट्रिय जनमत पार्टीका नेता इरफान अहमद शेषलाई धरौटीमा छुटाउन जनस्तरबाट रकम संकलन थालिएको छ । जनमत पार्टीका संस्थापक समेत रहेका शेषलाई हुण्डी सम्बन्धी कारोबार मुद्दाको अनुसन्धान गर्नका लागि बाँके प्रहरीले पक्राउ गरेको थियो ।
उनलाई बाँके जिल्ला अदालतले १५ लाख रुपियाँ धरौटीमा छोड्न अल्पकालिन आदेश दिएपछि उक्त रकम जुटाउन पार्टीले जनस्तरबाट रकम संलन गर्न थालेको हो । लालपूर्जा राखेर समेत रकम उपलब्ध गराएको राष्ट्रिय जनमत पार्टीका अध्यक्ष रियाज अहमद शेषले बताए ।
उनले आफ्नो हैसियत अनुसार विद्यार्थी, किसान, मजदुरले रकम दिएको बताए । पहिलो दिन झण्डै पाँच लाख रुपियाँ संकलन भएको उनले बताए । ‘अदालतको आदेश आएको चार दिनसम्म पनि धरौटी रकम जम्मा गर्न नसकेका नेता जी थुनामा हुनुुहुन्छ । जनस्तरबाट रकम जम्मा गरेर भए पनि धरौटी रकम बुझाएर बाहिर निकाल्ने छौँ,’ उनले भने ।
उनले नेता शेषलाई अनाहकमा फसाइएको बताए । आगामी निर्वाचनमा उम्मेदवार बन्न नदिने उद्देश्यले फसाइएको उनको भनाई छ । ‘जनताको काममा खटिने नेतालाई आगामी निर्वाचनमा उम्मेदवार बन्न नदिने षडयन्त्र भएको छ । उहाँलाई फसाउने ब्यक्तिको पहिचान गरि कारवाहीको दायरामा ल्याउन हाम्रो माग छ,’ उनले भने, ‘राज्यले अनुसन्धान नगरे पार्टीले अनुसन्धान गरि षडयन्त्रकारीलाई कारवाहीको दायरामा ल्याउँछौँ । जुनसुकै अपराधीलाई छाड्ने छैनौँ ।’
किसान, मजदुर र श्रमजीविको पक्षमा वकालत गर्ने इरफानलाई धरौटीमा छुटाउन सवैले सहयोग गरिरहेका अम्बीका शाहले बताइन् । उनले आफ्नो नेतालाई फसाउने उद्देश्यले षडयन्त्र भएको बताइन् । ‘निर्वाचनमा सहभागी हुन नदिन विपक्षीहरुले षड्यन्त्र भएको छ । यो हामीलाई स्वीकार्य छैन,’ उनले भनिन् ।
फसाउने ब्यक्तिलाई नछाड्ने राष्ट्रिय जनमत पार्टीकी एक कार्यकर्ताले बताइन् । उनले आफ्नो नेताको चरित्र हत्या गर्ने काम भएको बताउँदै उनले निष्पक्ष छानविन गर्न माग गरिन् । ‘कसले षड्यन्त्र गरेको हो, त्यो अनुसन्धानले स्पष्ट पार्ने छ । राज्यले अनुसन्धान गर्ला नै यसको हाम्रो टोलीले पनि अनुसन्धान गरि षडयन्त्रकारीको पर्दाफास गर्ने छ,’ उनले भनिन् ।
Discussion about this post